an pagtuktok hin lingganay kun panahon bin bagyo. Ngan pagsumat daw: kay ano nga hadton tuig 70, han paglilinti ha Binyang, nga dida umban han lingganayan ngan binuong an urasan ngan hin usa nga altar? Ano an binuhat han lingganay ni Sta. Barbara?
Hadto ngahaw naglilinti.
—Hesus-Maria-Hosep! Santa Barbara bendita, — nakapamulong 'hin dalidali an punuan, ginduduas, dungan an pangudos.
Hi Tasyo hinmarahara.
—Angay ka gud man hiton santa nga imo pinangangamuyo(2) — ginsiring niya hin kinatsila ngan talikdan dagos ngan magpadayon ngadto ha singbahan. An mga tanod nagtitindog didto ha sakob hin usa nga tumba nga ginlilibot hin mga kandila nga ipinangungusok ha mga kandilahan nga kahoy. Duha adto nga lamisa nga dagko nga gintungbaw ngan pagtabunan hin mga itom nga dugnit nga linigiran hin busag; ha mga luyuluyo pinintaran hin mga kalabera.
—Iginpapahanungod ini han mga kalag, o han mga kandila?— nagpakiana hi Tasyo.
Ngan han pakakita la hin duha nga kabataan nga may nanapulo in panuigon an usa, ug an usa man pipito, say niya dinaop waray na paghulat han baton han tanod.
—Maupod kamo ha akon, mga intoy?— nagpakiana.
— Hi iyo nanay may andam ha iyo nga panihapon nga angay hin kapadian.(3)
—Inin Sakristan Mayor diri natugot ha amon papanguli kun diri niyan nga ikawalo an takna, — binmaton an magurang. —Karuyag ko sumukot niyan nga gab-i han suhol ha akon kay ihahatag ko kan nanay.
—Ngayan? Ta, ngain man kamo?
—Ngadto ha igbaw kay kami an magdudublas han mga kalag.(4)
—Ngadto kamo ha lingganayan? Pagtagam kamo! Ayaw kamo paharani han mga lingganay kun ma glilinti. Katima gumawas didto ha singbahan kundi ginkinit niya anay hin dako nga kapaid an duduha nga kabataan nga nananaka han hagdan tipakadto ha kudo.
Hi Tasyo namahid han mga mata, hinmangad liwat ha langit ngan magmugo:
—Yana nahadlok ngahaw ako nga maglilinti.
