—Sayod ka man, ginang, nga diri ako nauyon han surundanon nga ginhadian. Dida han gutiay nga dugo hin insik nga sinunod ko kan adton inay baga dapit man liwat ako insik ha panhunahuna; gintatahod ko an amay tungod han anak, diri an anak tungod han amay. Karuyag ko nga an tagsatagsa kumarawat han suhol, o sirot, nga nahaaangay han lugaringon nga binuhatan, diri han binuhatan han iba; —Nagpamisa ka han nahatutungod hadton imo asawa sugad han sagdon ko ha imo kakulop?— nagpakiana an babayi pagbalhin han hiruhimangraw. —Waray! — binmaton an lagas, nagtitinawa. —Kanugon na]— nagsiring an ginang, dako an kasakit: — nasiring nga tubtob ngada buwas, ha mga ikanapulo an takna, man lulunghayaw an mga kalag kay maghuhulat han mga panabang han mga buhi; nga usa nga misa hini yana nga adlaw tuang hin lima ha lain nga adlaw han tuig, kun unom ba, siring han pulong han padi kanina han aga. —Asya ngayan, ha? May ada ngayan kita talaan nga adlaw nga angay pagpahimulusan? —Oy Duray! — sinmagbang hi D. Filipo; — maaram ka man nga hi D. Anastasio diri natuod han Purgatoryo. —Nga diri ako natuod han Purgatoryo? — rinmiwa an lagas, dapit binmuhat dida han iya linilingkuran. —Maaram ngani ako hiton iya kaagi! —An kaagi han Purgatoryo?— nagsabat an mag-asawa, dako an panhipausa. —Hala daw, ig-asoy daw! —Diri kamo lugod maaram, kamo nga masukot magpadara ngadto hin mga pamisa ngan naghihiruhimangraw kamo mahatungod hiton mga arantuson didto? Ta, kun asya man, labi na kay nagtikang na pag-uran, ngan ha akon pagsabot maiiha nga humuraw, diri kita pangunguyaman, — pulong ni Tasyo nga nanmurubuot hin madaliay. Kinidyom ni D. Filipo an basahan nga bitbit ngan hi Duray linmingkod ha iya harani andam hin diri pagtuod han bisan ano nga sumat han lagas nga Tasyo. Nagtikang ini hin pamulong pagkasiring: —Daan na may Purgatoryo, hadto han naiha pa kaupay ugsa umulpot ha kalibutan an aton Ginoo Hesukristo, ngan natatahapan nga aadto ha ilarom. han tuna, siring ni P. Astete,(6) o aadto ha dapit ha Cluny, siring han monghe
