17 Alagad cami, magña tugang, na magña nacasuhay sa saindo sa sarong cadiquit na panahon, sa paghiling, bacong sa pusó, orog pang naghihigñoa cami na mahiling an saindong lalaugon sa macuring pagmauot.
18 Nin huli caiyan binoot niamo na pomadian sa saindo, aco si Pablo sa catotoohan, sa macasaró asin macadua; alagad si Satanás inolang cami.
19 Háros ta, ¿arin an samuyang paglaom, ó caogmahan, ó corona na sucat cong ipanagsag? Bacó dao na iyo camo, sa atubang nin Cagurangnan tang Jesucristo sa pagdatong niya?
20 Na camo iyo an samuyang camurauayan asin caogmahan.
1 Nin huli caiyan na day na caini macacapaghalat, nagguirondom cami na matadá na magsarósaró sa Atenas,
2 Asin isinobol niamo si Timoteo, na samuyang tugang, asin may catongdan nin Dios, asin catabang niamo dian sa evangelio ni Cristo, sa pagpacarigon sa saindo asin sa pagsadol sa saindo dian sa saindong pagtubod,
3 Tagñaning day nin siysay man na maharonaod huli can magña casaquitan na ini; háros ta camo nacacaaram na cami anan na magña ibinugtac manogñod caiyan.
4 Na minsan gayod con dídian cami sa caibahan nindo, tinódan na niamo sa saindo na magaáguí cami nin magña casaquitan, siring sa nangyari asin nacatalastas camo.
5 Nin huli man caiyan, aco, na day na naghalat ó nagparahalat, isinobol co sa pagisi can saindong pagtubod, namá con nasugtan camo can paratocso, asin na si samuyang capagalan napamasangbasang sana.
6 Alagad nin si pagbalic paghalé dian sa saindo pasiring digdi sa samuyá ni Timoteo, asin na ipinagpatalastas sa samuyá si saindong pagtubod asin pagcamoot, asin na sa guiraray igua camo nin marhay na pacaguiromdoin sa samuyá, na nagmamauot camo na mahiling camí nindo, siring man sana cami sa saindo,
