SANG MADASON nga adlaw, daku nga katingala sang baryo, nangabáy nga madayon sa balay ni Kabesang Tales ang manog-alahás nga si Simoun, nga ginsunód sang duhá ka sulogùón nga nagdalá sang dalagkò nga mga maleta nga napondahán sing mga lona. Sa tungâ sang iya kaimulón, ang Kabesa wala malipát sang iya maayo nga pamatasan sa pagka-pilipinhon kag naglibóg kaayo ang iya ulo sa pagpanumdom nga walâ siá sing iamuma sa dumoluong. Apang si Simoun nagdalá sang tanan nga kinahanglan niya, mga sulogùón kag mga pagkaon, kag luyag lamang niya magpaligad sing isá ka adlaw kag isá ka gab-i sa amó nga baláy sanglit amó ang labing' maaliwanay sa bug-os nga baryo kag natungan sang duhá ka banwa sang San Diego kag Tiani, mga banwa diín ginhulát niya ang madamò nga manogbakal.
Si Simoun nakasayod sang kahimtangan sang mga alagyan kag namangkot kay Kabesang' Tales kon balá sa iya lamang isá ka rebolber tuman na nga maapinan niya ang iya kaugalingon batok sa mga tulisán.
—May mga pusíl silá nga matayog sing lupók! —hambal ni Kabesang Tales nga may kasubô.
—Ini nga rebolber indi magkubós sa katayog,— sabát ni Simoun nga tinilawán niya ang isá ka pagluthang sa paklang sang bonga nga nakità niya sa antad nga mga duhá ka gatós ka tikáng.
Nakità ni Kabesang Tales nga nagkahulog ang pilá ka bonga, apang walâ siá sing ginhambal kag nagpadayon sa pagpanumdom. Sa amát-amát nagsalampot ang nagkalainlain nga mga panimaláy nga naganyat sang kabantugan sang mga hiyás sang manog-alahás: naghalatag silá sing katahurán nga
ginpangabáy nila ang pag-agum sang maayo nga Paskwa, nag-
