—Gani man nga may mga alahas akó nga tuman ka dumàan,— sabát ni Simoun, nga kinakás niya ang putós sang Iona sang maleta nga labing' diutay.
Isa yadto ka maleta nga mahining nga asero nga may madamò nga buloborda nga sawáy kag may mga takóp nga bus-og kag marikót.
— May mga kolintas akó ni Cleopatra, nga mga tunay kag tutùo, nga nakità sa mga pirámide; mga singsing sang mga senador kag sang mga pamatan-on nga romanhon nga nakità sa mga ginub-an sang Cartago..
—¡Ayhan amó yadto'ng ginpadalá ni Anibal sang matapos ang inaway sa Cannes! —sugpon ni Kpn. Basilio nga maligdong kaayo kag nagkulurog sa kakunyag.
Ang but-anan nga tawo, bisán nga may madamò nga nabasahan nahanungód sang nagliligad, tungód nga walâ sing mga museyo sa Filipinas walâ sing may nakità nahanungód sadto nga mga panahón.
—May ari man akó, sang malahalon nga mga aritos sang mga babae nga romanhon nga nakità sa minurô nga baláy sang Annio Mucio Papilino sa Pompeya...
Si Kpn. Basilio naglungôlungò sa pagpakilala nga nakasayod man siá kag nagdalî siá sa pagtan-aw sang amó ka malahalon nga mga binilin. Ang mga babae naghalambal nga luyag man nila mag-angkon sang mga naghalalín sa Roma, katulad sang mga rosaryo nga nabenditahan sang Papa, mga binilin nga nagapatawad sa mga makasasalà nga indì na kinahanglan magkompesar, kbp.
Sang mabuksan na ang maleta kag mabatak ang hapín nga algodón nga gintabon, nakità ang sulodlan nga napun-an sang nagkalainlain nga mga alahas, mga relikaryo, mga gwardapelos, mga sang-an, mga alpiler, kag ibán pa. Ang mga brilyante, nga nasaktan sing mga bató nga may nanuhaytohay nga mga duág, nagkinilankilan kag nag-uluyog-uyog sa tungâ sang mga bulak nga bulawan nga lainlain sing mga balayán, nga may mga ugát nga esmalte, nga may mga dibuho nga matahúm kag tumalagsahon nga mga arabesko.1
_______________
1 Arabesco— Isa ka sari sang puníponi nga makita sa pinintahán, guhit sa kahoy, sa alpombra kag mga tela, diín ginahuwad ang mga bulak, mga dahon ukón bungangkahoy kon kaisá mga sapat kag dagway sang tawo.
