nga tuman ka kinaandan, ang mga naglilibot sa iya nagbatyag
sing diutay nga katahâ nga nasimbugán sing kahadlok. Si
Sinang makapilá nga nangalintak kag walâ na siá pagkusìá
sang iya ilóy, tungód ayhan kay daw pinunaw siá ukón tungód
man nga gin-isip niya nga ang isá ka manog-alahás katulad
kay Simoun indì maghingamó sa pagsaplid sing may dugang
nga limá ka pesos kapin ukón kulang tungod sa isá ka paghalawhaw nga walâ mapunggi. Ang tanán nagtulok sa mga
bató, walâ sing isá nga nagpakità sing diutay nga luyag sa
pagtandog, nahadlok silá. Ang pagpangosyoso pinunggan sang
balatyagon sa katingala. Si Kabesang Tales naglantaw sa
kaumhan, kag nanghunâhonà nga sa isá lamang ka brilyante,
ayhan isá ka labing' diutay, saráng na niya mabawì ang iya
anák, mahawiran niya ang iya balay kag ayhan makahawan
siá sing isá ka palangumhan Diwa! nga ang isá sang amó
nga mga bató nagabilí kapin pa sa puloy-an sang isá ka tawo,
sa katimawaan sang isá ka pamatan-on nga babae, sa kahidaitan sang isá ka tigulang sa iya nabilín nga mga inadlaw!
Kag subong sang ginbinagbinag niya sa iya hunâhonà, si Simoun naghambal nga ginpatuhoy niya sa mga panimaláy nga naglibot sa iya:
—Kag tuloka ninyo, tuloka ninyo! Sa isá siní nga mga magagming nga bató nga asul nga daw indi gid salapakon. kag indì makagalanyat, mga putli, katulad sang mga binukbok nga ginlapta sa kadaygan sang langit, isá lamang nga katulad siní, nga idulot sa tión nga kinahanglan, ang isá ka tawo nakapatapok sa iya kaaway, sa isá ka amáy sang panimaláy, nga bilang manogpagamó sa banwa ... kag ang isá ka bató nga katulad man siní, mapulá kaangay sang dugô sang tagipusùon, bilang balatyagon sa pagtimalós kag maidlak katulad sang mga luhà sang mga nailo, nakahatag sa amó nga tawo sing kaluwasan, nakabalik siá sa iya puloy-an, ang amáy sa iya mga anák, ang bana sa iya asawa, kag ayhan nakalwás sang isa ka bug-os nga panimaláy sa isá ka wala'y palad nga palaabuton.
Kag ginpulopukpok niya ang kaha...
— Dirí may akon akó, katulad sang mga kaha sang mga manogbulong, sugpon niya sa mabaskog nga tingog sa
