malain nga tinagalóg tinagalóg,—sang kabuhi kag kamatayon, ang
hilů kag bulóng, kag sa isá siní ka hakóp mapahibi ko ang
tanán nga pumoluyò sa Filipinas!
Ang tanan nagtulok sa iya nga may kakugmat kag nahangpan nila nga siá may katarungan. Sa tingog ni Simoun namutikán nila nga may bagay nga kalatingalahan kag ang malubhà nga mga silak daw lumabay sa tungâ sang iya mga tagusilang nga asul.
Daw sa pagtapnà bilang sang paghunâhonà nga ginhimò sang amó nga mga bató sa amó ka kubós nga mga tawo, pinatindog ni Simoun ang bandeha kag nakità ang idalúm díín natago ang sancta sanctorum. Mga sulodlan nga panit nga naghalín sa Rusia, nga napainpain sa isá kag isá sang mga habol nga algodon, nagpunô sang naidalúm nga bahin nga nalibután sang tersyopelo nga abúabuhon. Ang tanán nagpaabót sang mga kalatingalahan. Ang bana ni Sinang naglaúm nga nakità niya ang mga karbungko, mga mga bató nga nagawas-ag sing kalayo kag nagasilak sa tungâ sang mga kadulóm. Si Kpn. Basilio yadto sa mga ganhàan sang kabuhi nga wala'y kamatayon; matan-aw siá sang butang nga matùod, butang nga tutùo, ang butang nga ginhandum niya sing dakû.
—Iní amó ang Kolintas ni Cleopatra,— siling ni Simoun nga iya gin-andamán sing maayo ang pagkuhà sang isá ka kaha nga liso sa banhay sang latî. —Isá iní ka bahandì nga indi mahatagan sing bilí, isá ka butáng nga bagay sa museyo, bagay lamang sa manggaranon nga mga pangulohán.
Isá yadto ka dagway sang kolintas nga may nagkalainlain nga mga dibuho nga bulawan sa banhay sang mga hulohampanganan nga gintung-an sang mga bagangan nga lunhaw kag asul, kag sa tungâ isá ka ulo sang uwák, nga ginhimò sa isá ka tumalagsahon nga batóng' haspe, sa tungâ sang duhá ka pakpak nga nahumlad, tandà kag puní sang mga harà nga ehiptohanon.
Sang makità inâ ni Sinang pinakunót niya ang iya ilóng kag nangyam-id siá nga naghikay katulad sang batà, kag si Kpn. Basilio sa iya tuman nga paghigugma sang mga butáng
