Ang tagsa nagpilì sing isá ka alahas, may isá ka singsing, may isá ka taknàan, isá ka gwardapelo. Si Kapitana Tikâ nagbakál sing isá ka relikaryo nga may isá ka bilog nga bató nga may mga tigbató nga N.S. sa iya ikatlo ka kabít. Si Sinang, isa ka pares nga aritos kag si Kapitan Basilio, kadena sang taknàan nga ihatag sa alpéres, ang mga aritos sa babáe nga idulot sa kura kag ibán pa nga mga butang nga inogdulot; ang ibán nga mga panimaláy sang banwa Tiani nga indì magpaulihé sa mga taga-San Diego naghaw-as man sang ila mga palhok.
Si Simoun nagpamakál man sang mga alahas nga dumaan, nagpamaylo siá, kag ang mainot nga mga ilóy nagdalalá sadto'ng indì na nila magamit.
—Kag ikaw, wala ka sing mabaligyà?— pangkot ni Simoun kay Kabesang Tales, nga gintan-aw niya nga nagtuiok sa mga matá nga may kailà sang tanan nga pagbaligyà kag pagbaylo nga nahimò.
Si Kabesang Tales nagsilíng nga ang mga alahas sang iya anák naurot na tanán mabaligyà kag ang mga nabilín walâ sing pulós.
—Kag ang relikaryo ni María Clara?— pamangkot ni Sinang.
—Matuod —hinali nga namitlang sang tawo, kag sa makatión uminggat ang iya mga mata.
—Isá ka relikaryo nga may mga brilyante kag mga esmeralda, —siling ni Sinang sa manog-alahás,— gingamit yadto sang akon abyan sang walâ pa siá magsulód sa pagkamongha.
Si Simoun walâ magsabát; dayon ang iya pagtulok nga may kawili kay Kabesang Tales.
Sang tapos niya mabuksan ang pilá ka kahon nakita niya ang alahas. Tinan-aw sing maayo ni Simoun, binuksan niya kag tinakpan sing makapilá: amó man iní yadto'ng relikaryo nga gindalá ni María Clara sa pandot sa San Diego kag nga sa isá ka pagkibô sang iya balatyagon sa kaluoy ginhatag niya sa isá ka arùón.
—Naluyagan ko ang dagway,— siling ni Simoun. — Pilá ang luyag nimo sinâ?
