ang kinahanglanon amó ang nagpilit sa akon, kag sa baylo
sang imo rebolber ginbilin ko sa imo ang relikaryo nga ginhandum gid nimo. Kinahanglan ko ang hinangiban kag naglakát ako sa pagbuylog liwat sa mga tulisán. Ginapanugyan ko sa imo nga indi ka magpadayon sa imo paglakát, kag kon mahulog ka sa amon kagamhanan, sanglit indi na nakon ikáw dumalayon, pangayòan ka namon sing daku nga gawad.
- TELESFORO JUAN DE DIOS."
- Sa katapusan nakità ko ang akon tawo! - Kíbot ni Simoun nga binalhas. May diutay nga pangduhadoha... apang maayo man: makahibaló magtuman sang iya mga kompromiso!
Kag sinugò niya ang iya sulogùón nga mag-agi sa linaw sa pagkadto sa Los Baños, nga dal-on niya ang daku nga maleta kag hulatón siá didto, kay siá iya maagi sa dutà sa pagsunod nga dal-on niya ang nasudlan sang iya bantog nga mga bató.
Ang pag-abót sang apat ka Gwardya Sibil naghatag sa iya sa katapusan sing maayo nga kabubut-on. Nag-alabót silá sa pagdakóp kay Kabesang Tales kag walâ nila siá makità dinalá nila si Lolo Selo.
Tatlo ang ginpatáy sadto nga gab-i. Ang prayle nga asendero kag ang bag-o nga nagpanag-iya sang kadutaan ni Kabesang Tales nasapwan nga mga patáy, buóng ang ulo kag ang bàbà nadaskan sing balás, sa mga lindero sang iya kadutàan; sa banwa, ang asawa sang bag-o nagpanag-iya, nga napatáy sang pagpamanagbanag, pinatay man, ang bàbà dinaskan sing dutà kag ang liog gingulgol, nga may isá ka papel sa luyó dìín nabasa ang ngalan nga "Tales" nga nasulát sa dugô nga agi sang isá ka tudlò...
Magpakalinóng kamó, mahidaiton nga mga pumoluyò sang Kalamba! Walâ sing isá sa inyo nga ginatawag kay Tales, walâ sing isá sa inyo nga nakahimò sang krimen! Kamó ginatawag kay Luis Habaña, Matías Belarmino, Nicasio Eisagani, Cayetano de Jesus, Mateo Elejorde, Leandro Lopez, Antonino Lopez, Silvestre Ubaldo, Manuel Hidalgo, Paciano
