Dapat himuon ang sarang mahimo, mga ginuo, kag indi kita
magpadala sa mga balatyagon. Samtang nga sa tawhanon
nga paghatag sing katahuran gindumilian naton ang pagtanum sang apyan sa aton sakop nga kadutaan, ginapahanugotan
naton didto ang pagtabako, nga ang mahanabb nga wala naton
ginasumpong ang kaduyogan apang nagapaimol sa aton...
— Apang talupangdan nimo nga ina nagahatag sa pangulohan, nga wala ginapangabudlayi, sing kapin sa apat ka gatos kag kalim-an ka libo ka pesos, —sabat ni P. Irene nga labi nag-apin sa pangulohan... — ¡Tuman na, tuman na, mga ginuo! —hambal sang I. T. nga inutod ang binaisbais. —May akon ako nga mga buko nahanungdd sina kag ihalad ko ang akon pinasahi nga igtalupangod sa bahin sang pagpanudlo sa banwa. May iban pa?
Ang tiglikum nagtulok nga indi mahamtang kay P. Sybila kag kay P. Irene. Ang daku nga butang magwa na. Ang duha nag-aman.
— Ang solisitud sang mga bumolutho, nga nagapangayo sing pahanugot sa pagbukas sing isa ka Akademya sa kinatsila.
— sabat sang tiglikum.
Isa ka giniusgios sa kabilugan namutikan sa mga yara sa kadak-an, kag sang tapos sila magtinulokay inunay nila ang ila mga mata sa Heneral sa pagbasa sa iya nawong sang iya pagabuhaton. Mga anum na ka bulan ang nagligad nga ang solisitud yara dira nga naghulat sang pamatbat, kag nahimo nga daw nangin-kabangdanan sang inaway {casus belli) sa iban nga mga bagay. Ang Iya Taslangdon nagtulok sa ubos nga daw gindumilian niya ang pagbasa sang iya mga pang hunahona.
Ang paghipos sang tanan daw makahatag sing kahuya kag nahangpan ini sang Heneral.
— Ano sa imo hunahona? —pamangkot niya sa mataas nga alagad.
— Ano ang akon ginahunahona, Heneral ko! —sabat sang pinangkot nga pumakinhol sang iya mga abaga kag nagyuhom sing may kapait. — Ano ang ginahunahona ko kundi nga ang petisyon matarong, matarong gid kag naghatag sa akon sing katingala nga pinaligad ang anum ka bulan sa pagbinagbinag sina!
