militar, mga prayle, mga tumolùon, mga insik, mga dalaging,
nga gin-updan sang ila mga ilóy ukón mga tiyà, nga nagyaubay,
nagpangilayay, kag nagtinamyawanay sing daw malipayon.
Si P. Camorra didto sa iya ikalimá nga langit sa pagtan-aw sang madamò nga matahúm nga mga dalaga; madulog, maba likíd, matiklod kay Ben Zayb, mangalintak, manumpà kag magsilíng: Kag inâ kag inâ, mamantalà? Kag sinâ, anó ang masilíng mo? Sa iya kalipay gin-abiabi niya ang iya abyan kag kaaway. Ginpulopasiplatan siá ni P. Salví, apang daw wala lang siá magsapák kay P. Salví; sa baylo, ginsunggòán niya ang mga babáe agúd matandog niya silá, kag gintulok niya sing may kaibog.
- Nga yawir! San-o pa akó mangín-kura sang Kiapo? pangkot niya.
Sa hinali nanumpà si Ben Zayb, tumumbò siá kag tinungtong niya ang iya isá ka kamót sa iya butkon; si P. Camorra sa iya labing daků nga kakunyag nakakusî sa iya. Nag-abót ang isá ka tuman katahúm nga dalaga nga bumuyok sang igtalupangod sang bug-os nga plasa; si P. Camorra, nga wal makapugóng sang iya kaugalingon sa pagpangalipay, sinipit niya ang butkon ni Ben Zayb nga daw iya sang pamatan-on nga dalaga.
Si Paulita Gomez yadto, ang madayaw sa mga madayaw nga gin-updan ni Isagani; sa likód nagsunod si Donya Victorina. Ang dalaga nga pamatan-on makaililà sa iya kaayuayo; ang tanán nagdululog, ang mga liog naglulobag, nag-ulontat ang mga sugilanonáy, sinunód siá sang mga matá kag si donya Victorina nagbaton sang matinahuron nga mga pagyaób.
Si Paulita Gomez naggamit sing matahúm kaayo nga ka- misa kag panwelo nga pinya nga binordahán, nga mga tuhay sang sa iya ginsuót sang amó nga aga sa pagkadto sa Sto. Domingo. Ang asuasuhon nga tela sang pinya nagahimò sang iya matahúm nga ulo nga isá ka ulo nga huwaran, kag ang mga indyo nga makakità, nagpaanggid siní sa bulan nga ginalibután sang maputi kag manipis nga mga panganod. Isá ka saya nga suklà nga rosa ang duág, nga pinakunótkunót sing makaluloyag sang diutay nga kamót, naghatag dalaganganon nga danyag sa iya nagtiundo nga dughan, nga ang iya mga
