This page has been validated.
191
Si Ben Zayb nagtanyag sa pagpakighambal sang butáng kay Mr. Leeds; ang amérikanhon indi makapamalibad sa isá ka mamantala nga saráng makabalos sa isá ka sinulatán nga makapalain.
—Makità ninyo nga ang tanan nahanungód lamang sa mga espeho,— silíng niya,— kay tan-awon ninyo...
Kag naghatag na man sing isá ka malawig nga kasaysayan, kag sanglit walâ sa iya atubangan sing bisán isá ka espeho diín niya mapakilala ang iya kasaysayan, sinal-után niya sang tanan nga kabutigán nga iya mahimò nga natapos nga wala siá makahibaló kon anó man ang iya ginhambal.
—Sa katapusan, makità ninyo nga ang tanán tungód lamang sa panulok.
