Si Ben Zayb, sa pagpabugtaw sang balatyagon sang mga tumalan-aw kag sa pagbutáng sa ital-ital kay Mr. Leeds, naghambal sa iya sa paningog nga naanaran:
—Oy, Mister, sanglit kamihanon lamang dirí kag indi kami mga indyo nga saráng mabunít, pahanugatan mo nga patan-awón silá sang likúm?. Nahibal-an na namon nga bu táng gid lamang inâ sa panulok, apang sanglit si P. Camorra indi buót magpati...
Kag linumpat niya ang kudál, nga walâ mag-agi sa ganhàan, samtang si P. Camorra namatok kay nahangaw-an niya kon balá si Ben Zayb may kinamatarong.
— Kag ngàa man indì, ginuo? — sabát sang amérikanhon.-Apang ayaw paggub-a dirí ang maskin anó, mahimò?
Si Ben Zayb didto na sa nasalugán.
— Mapahanugot ka?— siling niya.
Kag walâ na maghulát sang sabát, nga sa iya paglaum indì pag-ipahanugot sa iya ni Mr. Leeds, binatak niya ang panyù kag pinangità niya ang mga espeho nga iya ginpaabót didto sa tungâ sang mga tiíl sang latók. Si Ben Zayb nagkibot sing diutay nga katingala, umisol, sinuksok niya liwát ang iya duhá ka kamót sa idalum sang latók nga inuyóg niya: nakità niya nga walâ sing unód. Ang latók may tatlo ka tiíl nga magag. may nga salsalon nga natanúm sa salóg.
Ang mamantalà nagtulok palibot nga daw may ginpangità.
— Diín na ang mga espeho? — pangkot ni P. Camorra.
Si Ben Zayb nagtan-aw nga nagtan-aw, pinâpà niya ang latók, binatak ang panyù, kag sa tión kag tión tinaklap niya ang iya palad sa iya agtang nga daw may ginpanumdom.
—May nadulà ka?— Pamangkot ni Mr. Leeds.
—Ang mga espeho, Mr. Leeds, diín ang mga espeho?
— Ang sa imo wala akó makahibaló kon diín, ang sa akon didto sa balay-dalayunán. Luyag mo tan-awón ang imo nawóng? Daw ginakibáng ka kag nagapalangluspad.
Ang kadamban, wala'y sapayán sang ila nakità, sang makità nila ang paglinóng nga may pagyagutà sang amerikanhon nagkinadlaw kag si Ben Zayb nga nahuy-an kaayo bumalik sa iya pulungkòan nga nagkumod:
