ilalakób, kag subong nga ang madalum nagtawag sang madalum (abyssus abyssum invocat), ang amó nga mga matá nagunay sa pagtulok sa nagkulpà nga mga mata ni P. Salví nga
naghilitad subong sang may nakità nga isá ka bahoy. Si P.
Salví nagkulurog.
— Espinhe,— silíng ni Mr. Leeds,—isugid sa tumalambong kon sin-o ikaw!
Humari ang madalum nga kalinóng. Matugnaw nga hangin lumibot sa kadak-an kag pumahilayhilay sang asulasulon nga siga sang mga lámpara nga gingamit sa lulobngan. Ang mga labing' indi mapinatihon nagpalangurog.
—Akó si Imuthis,—sabát sang ulo sa tingog nga gikan sa lulobngan apang kalabulongan nga makapapahog. — natawo akó sang panahon ni Amasis kag napatay akó sang paggahúm sang mga Persyanhon, samtang nga si Cambyses nagbalik gikan sa iya makalalaglag nga pagpanalakay sa sulod sang Lybia. Natapos ko ang akon pagtuón sang tapos ko mahiwat ang malawig nga pagpanakayon sa Grecia, Asiria kag Persia kag bumalik ako sa akon pungsod sa pagpangabuhî tubtob nga tinawág ako ni Thot sa atubangan sang iya makahaladlok nga hukmanan. Labot pa sa malaot ko nga palad, sang pag-agi ko sa Babilonia nasapwan ko ang isá ka makalilisang nga likúm, ang likúm sang butigón nga Smerdis nga umagaw sang kagamhanan, ang makahaladiok nga mago nga si Gaumata nga nagdumala paagi sa linugos nga gahúm. Sa kahadlok nga masugid ko siá kay Cambyses, ginpat-od niya ang paglaglag sa akon paagi sa mga parì nga ehiptohanon. Sa akon pungsod amó iní silá anay ang naggahúm; mga tag-iya sang duhá sang tatlo ka bahin sang kadutàan, bug-os nga mga tagangkon sang syensya, binutáng nila ang banwa sa kapakok kag sa kapintasan, ila ginsakít kag ginpasaylusaylo halín sa isá ka gahúm pakadto sa isá ka gahúm nga walâ magpamatok. Ang mga mananalakay naghimulós sa amó nga mga pari kag sang nasayran ang ila kapuslanan ginsakdag nila kag ginpamanggai, kag ang pilá indi lamang nga nagsalig sa ila, kundì ginhimò nga mga kabulig sa ila mga tinutuyò. Ang mga parì nga ehiptohanon nagtalanyag sa pagtuman sang mga sugò ni Gaumata sa daku nga kaluyag kay nahadlok silá nga ibuyag-
______________
4 Mago— Isa ka título nga ginhatag anay sa Sidlangán sa mga pilosopo, mga hari, ukon mangin-alamon nga mga tawo.
