PILIBUSTERISMO
matahum nga ilong nga iya sang hudiyo, kag ang iya sotana nga sukla nga natabas sing maayo kag may magagming nga mga butones; kag ang isa ka manggaranon nga manog-alahas nga isa ka Simoun nga nangin-palamangkutan kag tagpasud-o sang tanan nga buhat sang Iya Taslangdon nga Kapitan Heneral,
talupangdon ninyo nga makita ini nga kadalagkoan sine quibus non(3) sang pungsod, nga didto nagginubangoban nga nagsinugilanon sing mahamuot, kag wala magpakita sing pagtalupangod sa isa ka babaeng’ pilipinhon nga sinikway, nga naglugom sing pula sang iya buhok, may mga kabangdanan nga madula ang pagpaumod sang isa ka babaeng’ Joba, hayu nga gingamit ni donya Victorina kon may yara sia nga kasumpong.
Kag ang malain nga buot sang babae nagdugang tagsa magsinggit ang kapitan nga baborpl!(4) estriborp!(5) nga maabtik hunuson sang mga grumiti ang malaba nga mga tukon, kag itublok sa pihak kag pihak nga pangpang, nga ila ginpunggan, sa kusog sang ila mga batiis kag mga abaga, ang pagdapat sang lawas sang bapor sa higad. Amo ini ang kahimtangan sang bapor sang Pangulohan, nga sarang masiling nga gikan sa pagkabao mahimo nga alimango tagsa nga maghilapit ang isa ka katalagman.
— Apang, kapitan, ngaa man nga ang imo lungoslungos nga timonel nagkadto sa sina nga higad? — pamangkot sang ginang nga naakig kaayo.
— Tungod kay didto tama kanabaw, ginang, — sabat sang kapitan sa tuman kalagnay nga inanay pinapirot niya ang iya pihak nga mata.
Ang kapitan may iya sini nga diutay nga batasan nga daw masiling sa mga tinaga nga nagkawas: maghinay, maghinay gid!
— Tungatonga ang makina ayaw, tungatonga ang makina! May pagkamatinaastaason nga namatok si donya Victorina, —Ngaa indi bug-uson?
— Kay makadto kita sa sina nga kahumayan, ginang, —sabat sang indi matublag nga kapitan nga pinataliwis niya ang
————————
- 3 Sine quibus non — Kon wala sila indi mahimo.
- 4 “Baborp!” — “Sa wala!’ Mandu sang kapitan sang bapor sa iya mga grumiti.
- 5 "Estriborp! — “Sa tuo!”
