nagtubò sa iya ang daku nga luyag sa paglalás sang parì kag
paghulog sa iya sa tubig.
Pumadayon siá sa Escolta kag bumatyag siá sing daků nga luyag sa pagsugod panumbag sang duhá ka agustinos, nga nagpulungkò sa ganhàan sang basar ni Quiroga, nagkilinadlaw kag naglinahog sa mga prayle nga yarà sa sulod sang balalig. yàan nga naghilinun-anon; mabatián ang masinadyahon nila nga mga tingog kag tinalangkaw. Sa malayûlayô duhá ka kadete naglambot sa asera nga nagpakigsugilanon sa isá ka alagád sang almasin nga nagbayò sing may malabà nga mga manggas; si Plácido Penitente nagpadulong sa ila sa pagpahawà sa alagyan, kag ang mga kadete nga nakakità sang malain nga tuyò sang pamatan-on kag sa maayo nga kabubut-on, naghatag sing alagyan agúd walâ sing mahanabò nga gamó. Si Plácido sa amó nga mga tión gingahumán sang sálot1 nga gintawag sang mga malayunhon.
Si Plácido, samtang nga naghilapít sa iya baláy, — sa balay sang isá ka platero diín siá nagpuyô nga nagpangasera, nagtinguhâ sa pag-alangot sang iya mga kaisipán kag pinat-od ang isá ka bukò. Mabalik siá sa iya banwa kag magtimalós sa pagpakità sa mga prayle nga indì silá dapat magpakahilway sa pagpasipala sa isá ka pamatan-on ukón magyagutâ sa iya. Naghunâhonà siá sa pagsulát gilayón sa iya ilóy, kay Kabesang' Andang, sa pagpasayod sa iya sang nahanabò kag sa pagsiling sa iya nga ang mga buluthòan natakpan na sa iya tubtob kon san-o, kag kon yarà ang Ateneo sang mga heswita sa pagtapos sang iya kurso, sa amó nga tuig, ginduhadohaan nga indì siá pagpahanugotan sang mga dominíko sa pagsaylo kag bisán pa nga matigayon niya, sa kurso nga madasón dapat siá magbalik sa Unibersidad.
— Silíng nila indì kamí makahibaló magtimalós!—Hambal niya. Maglupók ang lintì kag tan-awón naton!
_________________
1 Sálot— Suno sa Tagsulat ginatawag ini nga hamok. Isá ka hinali nga pagdula sang panumdoman sang tawo, nga masami nagakahanabo sa mga malayunhon: ang maabután sang salot nagebatyag sang masingkal nga luyag sa pagtimalós, kag ang iya handum indi liwan kundi ang magpilas kag magpatay sang ibán nga tawo. Nahanabo ini sa bantog nga pintor nga pilipinhon nga si Juan Luna nga inabután sang sálot kag pinatay niya ang iya asawa kag ang iya ugangan nga babae kag ginpilasan man niya ang iya isá ka bayaw nga lalaki sa Paris. Ini nga sari sang balatian wala pa matun-i tubtob karón sang mga mangin-alamon sa pagpamulóng.
