Apang si Plácido walâ makaisip nga may naghulát sa iya sa balay sang platero.
Si Kabesang Andang bag-o lamang mag-abót gikan sa Batangas kag nagkara sa pagpamalaklon, sa pagduaw sa iya anák kag nagdalá sa iya sing kwarta, tapa sang usa kag mga panyù nga suklà.
Nagligad ang nahauná nga mga pag-abiabi, ang kailó nga babae nga kutob sang pamunò nakamutík sang masulub-on nga panulok sang iya anák, indi na makapugóng kag sinugdan niya ang mga pagpamangkutanon. Sa nahauná nga mga kasaysayan, ginbilang ni Kabesang' Andang nga isá ka paón, nagyuhóm kag gin-uloulohan niya ang iya anák, ginpahanumdom niya sang mga pag-antos, sang mga pagpagutomgutom kag ibp., kag naghambal nahanungód sang anák ni Kapitana Simona nga, sa iya pagsulod sa Seminaryo, nagpakita sa banwa nga daw isá na ka obispo: si Kapitana Simona ginbilang na nga daw isá ka ilóy sang Dios, matuod, kag ang iya anák nahimò nga isá ka Jesucristo!
—Kon ang anak mahimò nga isá ka pari,— silíng ni Ka besang' Andang, ang ilóy indi na magbayad sang iya nautang sa aton... Hantì sin-o ang masukót sa iya?
Apang sang makita niya si Placido nga naghambal sing maligdong kag nabasa niya sa iya mga matá ang unós nga nagbagrong sa sulód sang iya pagkatawo, nahangpan niya nga ang ginsugid sa iya may kamatuoran. Naurongán siá sing pilá ka tión nga indi makahambal kag sang ulihe humibî nga nagnguyngoy.
—Ay! silíng niya,— kag akó nga nakatug-an sa imo amáy nga tipigan ko ikaw, patun-an kag himùon ka nga mananabang! Nagdumili akó sa akon kaugalingon sang tanán agúd lamang nga makatuón ka! Sa baylo nga magkadto akó sa pangginggi diin ang pustahanay tagtungâ sa pesos, nagkadto lamang ako sa tagtungâ sa real2 nga nag-antos sang malain nga bahù kag mga baraha nga bulingón. Tan-awa ang akon mga kamisa sinursihán! Sa baylo nga magbakál sing mga bag-o, ginhinguyang ko ang kwarta sa mga pagpamisa kag sa mga pagdulot kay San Sebastian, bisán nga walâ akó sing tuman
_____________
2 Real- Timbang ini sang isa sang napulo ka bahin sang pesa ukon. 10 ka sentimos.
