- 207
prontal,4 mga sirial kag mga kandelabro5 nga lunsay pilak nga
sa kaluoy sang mga matinuohon gindulot sa isá ka simbahan;
ang mga prayle, sugid sang isá ka platero, nakapahimò sa
Hong Kong sing liwan nga mga prontal, mga siryal kag mga
kandelabro nga lunsay nagkaangay, apang sa pilak nga Ruolz,
nga amó ang ila ginbaylo sa mga tunay nga ila ginpatunaw,
kag ginhimò nga mga pesong' mehikanhon. Amó iní ang
maragtas nga iya nabatián kag bisán nga sugilanon lamang
ukón ginhutikhotik, ang iya kaaligutgot nagbilang sinâ nga
matuod kag nadumdomán niya ang ibán pa nga nagkahanabò
nga nagkaangay man. Ang handum sa pagpuyô nga hilway
kag ang mga bukò sa pagpangità sang kalalangan amó ang
nagpapat-od sa iya sa pagkadto sa Hong Kong.
-Luyag akó nga magmahilwayon, magkabuhî sing hilway!...
Nagab-ihán siá sang libot sa San Fernando, kag sanglit walâ siá sing nakità nga isá ka abyan nga sakayanon, ginpakamaayo niya ang pagbalik. Kag tungód ang kagab-ihon matahúm kag masanag ang bulan sa langit nga naghimò sang kubós nga siudad nga isá ka makatilingala nga ginharian sang mga diwata, nagkadto siá sa perya. Didto nagpakadto-pakarí siá nagpangadtukadto sa mga balaligyàan nga walâ magtamód sa mga ibalaligyà, nga ang iya panumdoman naunáy sa Hong Kong, magkabuhi sing hilway, kag magmanggad...
Buót na siá nga maghalín sa perya sang makità niya kag makilal-an ang manog-alahás nga si Simoun nga nagpaalam sa isá ka europanhon kag naghambal silá nga duhá sang iningles. Sa kay Plácido, ang tanan nga pulong nga ginham. bal sa Pilipinas sang mga tagá-Europa, nga indi kinatsilâ, dapat nga mangi-inglés: Labot pa nabunit sang aton pamatan-on ang tinagâ nga Hong Kong.
Kon matugyan siá lamang kuntanì sang manog-alahás nga si Simoun sa amó nga dumoluong nga mataliwan pakadto sa Hong Kong!
4 Frontales - Ang itúm nga mga mantilyena nga ginatabon sa ulo sang kabayo nga nagaguyad sang karo sang patay.
5 Ciriales y Candelabros Mga tukon nga pilak nga suluksakan sang mga kandila.
