218
kontrato sa Pangulohán kag sa Ayuntamyento, nga ginhimò siá nga konsehál, sang ulihe alkalde, bokal sang Sociedad Eco nómica de Amigos del Pais, palamangkutan sang Administrasyon, pangulo sang Hubon Tagdumala sang mga Buhat sa Kaluoy, bokal sang Hubón sa Kaluoy, direktor sang Banco Nacional Filipino, kag ibp. ibp. Kag indì pagbilangon nga iní nga ibán pa kaangay sadto'ng mga ginbutáng nga biyà sa katapusan sang malawig nga listahan sang mga título: Si D. Custodio, nga walâ gani makakità sang isá ka hilisayran nahanungod sa Katinlò, nahimò pa siá nga Tal-os Pangulo sang Hubón sa Katinlò sang Manila, ang matuod pa nga sa waló nga katapò siní ang isá dapat mangín-isá ka tunay nga médiko kag ang isa nga iní indì mahimò nga siá. Subong man nahimò siá nga bokal sang Ulong' Hubón sa Pamakuna, nga gin tapòan sang tatlo ka médiko kag pitó ka timawà, nga sa siní nalakip ang arsobispo kag tatlo ka probinsyal; nangín-utod siá sang mga kopradya ukón talapùanan sa paghiliutod sa pagtuluohan kag sang labing' mataas nga kopradya, kag, nakità na naton, bokal nga tagdumala sang Mataas nga Komisyon sa Pagtulon-an nga Primarya nga walâ man sing nahimò, mga kabangdanan iní tanán nga tuman kadakô agúd nga pagtumpokán siá sang mga pamantalaan sang tanan nga pagdayaw. kon siá maglakát ukón magpangatsi.
Wala'y sapayán sang madamò nga palangakòan, si D. Custodio indi katulad sang ibán nga nagtulog sa mga sesyon nga nagpakamaayo lamang, katulad sang mga diputado nga matalaw kag matamad, sa pagbuylog sa kabubut-on sang kalabanan. Baliskad sa madamò nga hari sa Europa nga nagdalá sang título nga hari sa Jerusalem, si don Custodio nagpakilala sang iya kadungganan kag kinuhà niya gikan dirâ ang tanan nga dugâ nga sarang niya makuhà, masakò nga nagpasampok siá sang iya mga kilay, nagpadaghob sang iya tingog, nag-ubó siá sang mga tinaga kag sa makadamò ginhinguyang niya ang tanán nga sesyon nga nagpatpat sang isá ka sugilanon, nga nagpahayag sang isá ka bukò ukón sa pagpakigsumpakil sa isá ka katapò nga naghatag sa iya sing mga pagpamatok. Wala'y sapayán nga wala pa siá makaligad sa kap-atán ka tuig nga kagulangón. naghambal na siá sa bagay nga may paghalong, nga naghulát sa pagpatanáng sang mga bungangkahoy,
