SANG AMO NGA GAB-I may daku nga palagwàon sa Teatro Variedades.
Ang gubán sang operetang' pranses ni Gg. Jouy naghatag sang iya nahauná nga palatuntonan nga Les Cloches de Corneville, kag mapakità sa mga matá sang mga tumalan-aw sang iya pinili nga gubán (troupe) nga ang iya kabantugan kutob sang pilá ka adlaw ginhambal sang mga pamantalàan. Ginsugid nga sa mga gumulowà may yarà nga may labing' matahúm nga tingog, apang ang iya panglawasón labí pa gid nga matahúm, kag kon patihon ang mga hinuringhoring, ang iya pagkamaanggàon kapin pa sa iya tingog kag panagway.
Sang ikapitó kag tungâ sa gab-i walâ na sing mga tiket bisán pa sa kay P. Salvi nga daw tagumatayon, kag ang mga sa entrada heneral naghiwat sing malabà nga katay. Sa galawarán sing tiket may mga ginamo, mga inaway, naghambal silá sang pagkamabinatukon kag sang mga kabikahan, apang indì tungód sinâ nga nakatigayon silá sing mga tiket. Napulò kag limá ka minuto sang wala pa ang ikawaló ang taknà mahál na ang mga bilí nga gintanyag sa mga pulungkòan sa anpiteatro.1 Ang danyag sang baláy nga teatrohan, nasug-an sing masanag kaayo, nga may mga tanúm kag mga bulak sa tanán nga ganhàan, nagpaganyat sa mga nag-alabót nga ulihé, nga nag- panghalawhaw kag nagpinalakpak. Madamò nga tawo ang nagginutok palibot nga nagtululok nga nahisà sa mga nag- sululód, sa mga nag-alabót sing maaga nga nahadlok nga ma- dulàan silá sing mga pulungkòan: mga kinadlaw, mga kini- butkibot, mga pagpaabót amó ang nagsumalang sa mga bag-o nagsalampot, nga, naglain ang ila buót, nagsilimpon na lamang silá sa mga naglalantaw, kag, sanglit kay indì man silá maka-
1 Anfiteatro - Ang mga pulongkoan sa sulod sang teatro nga malapit kag
nagaatubang sa entablado.
