Ang tanán nakahangóp nga dalayawon ang proyekto gani nga silá nagtalangutangò. Si Dn. Custodio lamang, ang maalwan nga Dn. Custodio, tungód sang iya pagkahilway kag sa —iya mataas nga mga palangakòan, naghunâhonà nga dapat niya pamatukan ang isá ka proyekto nga indì maghalín sa iyainâ isá ka pagpangagaw! Kag umubó, hinikap niya ang iya mga bigote kag sa iya tingog nga may ikasaráng kag katulad sang yarà siá sa isá ka sinapol sa Ayuntamyento, humambal:
— Pasayluha akó, Gg. Simoun, tinatahod ko nga abyan, kon isugid ko sa imo nga walâ akó nagabuylog sa imo kaisipán; magabilí sing madamò nga kwarta kag ayhan gub-on naton ang mga banwa.
Gani man nga gub-on! —sabát ni Simoun sing mabugnaw.
—Kag ang pilak nga ibayad sa mga magahilikot....?
—Walâ silá ginabayari. Gamiton ang mga pinanghunong kag mga binilanggò.
— Abá, indi makaigô, Gg. Simoun!
—Hanti kon indì makaigô, ang tanan nga banwa, ang mga tigulang, ang mga pamatan-on, ang mga kabataan mag-palangabudlay sa baylo sang napulò kag limá ka adlaw nga piliton silá, tatlo, apat, limá ka bulan tuhoy sa Pangulohán, nga may katungdanan, pa gid, sa pagdala ang tagsa sang iya kaugalingon nga pagkaon kag mga galamitón: Si Dn. Custodio, nga nahangawà, bumalikíd sa pagtan-aw kon sa malapít may isá ka indyo nga nakabatî sa ila. Maayo lamang kay ang yadto didto mga umanhon lamang, kag duhá ka timonel nga daw masakò kaayo sa mga likûlikò sang subâ.
— Apang, Gg. Simoun...
—Ayaw ka magpabuang, Dn. Custodio, —padayon ni Simoun nga mamalá,— sa sinâ lamang nga bagay nga mahimò ang dalagkò nga hilikutón sa diutay nga kahinguyangan. Sa amó nga paagi nahumán ang mga Pirámide, ang linaw sang Moeris kag ang Koliseyo sa Roma. Lunsay mga tagá-puód nag-alabót gikan sa mga desyirto nga nagdalalá sang ila mga sibuyas nga ila kaunon; mga tigulang, mga pamatan-on kag kabataan nagpalangabudlay nga nanghakot sing mga bató, nga ila ginpamihak kag ginhakot sa ila mga abaga, sa idalum sang
