Sa katapusan umabot ang utbong sang nahauná nga gwâ diín dinalá sang markes bilang mga sulogùón si Serpolette kag si Germaine, ang dagway sang kaayuayo nga may pagka-mahuluy-on sang gubán kag bilang manogtudlò ang buangit nga si Grenicheux. Isá ka guób sang pinalakpak ang pumagwâ liwát sa ila nga nag-inuyatay sa kamót nga sang limá ka tión nga nagligad naglinagsanay kag buót magsinumbaganay, nga nag. yaób dirí kag didto sa maabiabihon nga mga tumalan-aw sang Manila kag nagpakigsayluhanay sing halangpon nga mga panulok sa pilá ka tumalan-aw.
Samtang nga naghari ang labáy nga kinagulà, nga ginhimò sang mga nagpanalasâ sa pagkadto sa ililisán sa pagpangibulahan sa mga artistang' babáe, sang mga nagkaladto sa paghatag katahurán sa mga ginang sa mga palko, ang ibán naghatag sang ila paghukóm sa palagwàon kag sa mga babaeng artista.
Sa wala'y duhadoha, si Serpolette amó ang maayo sa tanán, siling sang isá nga nagpakità sing hulag nga maalam.
—Ang naluyagan ko si Germaine, isá ka babáeng' huwaran nga bukay sing buhok.
—Walâ siá sing maayo nga tingog!
—Kag ano ang pulós ko sang tingog!
—Kon sa panglawasón, ang mataas!
—Psh! —tugdà ni Ben Zayb. —walâ sing isá nga bagay dayawon, walâ sing isá nga artista.
Si Ben Zayb amó ang tagsabdong sang "El Grito de la Integridad" kag ang iya hulag nga may pagyubit naghatag sa iya sing daku nga pagtalupangod sa mga matá sang mga naayawan sa diutay nga butáng.
—Bisán si Serpolette walâ sing tingog, bisán si Germaine indì anyòán, bisán inâ indì músika bisán arte walâ gid! -hingapos niya nga may talunghayag nga pagyubit.
Agúd bilangon siá nga isá ka dakû nga mananabdong walâ na sing maayo kundi magpakità nga walâ siá maluyag sang tanán. Ang kumboyahan sang palagwàon walâ makapadalá kapin sa duhá ka tiket sa Sulolatan sang pamantalaan.
Sa mga palko ginpinamangkot nila kon sin-o ang tag-iya sang palko nga walâ mapungkòí. Magaangkon sang labing maayo nga pagbilang yadto'ng maabót nga ulihe sa tanán.
