- 269
tagumnon nga langit, sa ibabaw sang mga hanulhanol sang
linaw nga nagalibot sa mga bukid nga daw sápiro kag mga
baybayon nga daw esmeralda; sa iya daw katyà nga mga sapâ
nga ginalandungán sang mga kawayan, diín nagatulubò sa mga
pangpang ang mga bulak kag nagahinampang ang mga tumbaktombak kag mga alibangbang nga nagalulopád nga wala'y
padulongan kag mahimayàon nga daw nagapakighampang sa
hangin; sa kalinóng sang aton mga talunan, sa ambahanon
sang aton mga sapâ, sa nagasagaháy nga mga batomaidlak sang
aton mga busáy, sa masili nga kasanag sang aton bulan, sa mga
panaghoy sang dupoydupoy sa kagab-ihon, ang tanan, sa katapusan, nga mapanan-aw ang larawan sang ginahigugma makità
ka namon tubtob sa katubtoban subong sang pagdamgo namon
sa imo, maanyag, matahúm, nagahuyóm katulad sang paglaum,
putli subong sang kasanag, apang, masubô kag mamingawon
nga nagatan-aw sang amon mga kalisdanan!2
2 Daw and nga balatyagon ang matuga sini nga mga dinalán, nga napun-an sing dalisay nga binalaybay, labí na gid sa mga nakasayad sang kalag ni Rizal! Yadto'ng wala'y palad nga pamatan-on nga babáo, nga nangin-kahagugma ni Ibarra-Simoun, gintigbaliw sang Tagsulat sa isá ka larawan sang Pungsod. Ang pamantalaan sa Manila nga Grito del Pueblo, sang pagligad sang waló ka tuig nga nabatak sa ulosiudad sang Filipinas ang hayahay nga amerikanhon, nagbantala sang isá ka sinulatán, nga sa kabilugán nagsiling sing amó ini: nga ang pungsod sang Filipinas wala magribók batok sa España kundi batok sa mga prayle nga nagpakalakás sang ila kagamhanan, nga silá nagtuluo nga silá mataas pa sa Heneral, sa Gobernador sang banwa, sa Gahum sang hukmanan, sa mga Obispo na gid, tubtob nga ginhikayan pa nila ang ila mga kadugo nga tagá-peninsula ukón mga katsila nga sang ulihe nagkalari sa Filipinas gikan sa España. Ila gindaugdaog, ginhanot ang mga indyo sa mga tagsaon nga uwáy, kag ila gintampalas ang dungóg sang ila mga ilóy, mga asawa kag mga anak nila nga babae.
Si María Clara, ang kahagugma ni Ibarra-Simoun, gintudlak sang isá ka pralye kag ginlugos man sang isá ka prayle sa kombento.
