kahagugma napatay nga naghimud-os sa mga kinamatarong
sang akon pungsod!- Pauli kitá sa baláy, anák, basi tugnawán ka! - singgit sa amó nga tión ni donya Victorina.
Ang tingog pumabalik sang iya panumdoman sa kamatuoran. Taknà na yadto sa pagbalik, kag sa mahigugmaon inagda nila si Isagani sa pagsakà sa kotse, pangagda nga wala na mapasulit sang pamatan-on. Sanglit ang kotse iya ni Paulita, sanday donya Victorina kag ang iya abyan nagpungkò sa likod nayon, kag sa diutay nga pulungkòan sa atubangan ang duhá ka magkahagugma.
Magbuylog sa amó man nga kotse, magpungkò siá sa iya luyó, maghaklò sang iya kahamót, magsag-id sa suklà nga bahin sang iya panapót, magtan-aw sa iya nga nagapadalum sang iya hunáhonà nga nagapanimukò, nga gindigos sang kasili sang bulan sang Filipinas, nga nagtanyag sa mga butang nga labing' kubós sing balatyagon nga halandumon kag kalailàan, isá yadto ka damgo nga walâ pagpaabutá ni Isagani! Daw anó ka makaluluoy tulukon yadto'ng nagpalauli nga naglalakát lamang, nga isáisa, kag kinahanglan nga maghalawà sa paghatag alagyan sa madasig nga kotse! Sa bug-os nga kalawigón sang dalan, pangalihid sa baybayon, sa dalayanán nga La Sabana, sa taytay sang España, si Isagani walâ sing makità lwás sang isá ka malulot nga banhay sang nawóng nga ang buhók napahipid sing makaililà, nga nagdapat sa malubay nga liog nga natabunan sa tungâ sang mga gasa nga pinya. Isá ka brilyante ang nagpangilay sa iya kutob sa labitlabit sang iya diutay nga dulonggan, nga daw isá ka bituon sa tungâ sang daw pilak nga mga panganod. Nabatián ní Isagani ang malayo nga mga tingog nga nagpamangkot sa iya nahanungod kay don Tiburcio de Espadaña, sang ngalan ni Juanito Pelaez, apang sa iya daw bagting sang lingganay nga mabatián sa malayo, mga tingog nga nagsalamò nga mabatián sa damguhanon. Kinahanglan nga pahanumdumón siá nga nakaabót na silá sa plasa sang Santa Cruz.
