Nagkinadlaw silá, naglinahugay, apang maathag nga sa ila pagkinalipay may kabug-at ang ila balatyagon; ang mga yuhóm nagkurog gikan sa kakibáng, gikan sa ila mga matá naggwâ ang daw kilát nga mga igpat kag sa pilá sa ila makità ang paggataw sang luhà. Kag wala'y sapayán, ang amó nga mga pamatan-on mapintas, indi matarong! Indì kay makaisá lamang nga ginpamatbatán sing amó iní ang ila labíng' matahúm nga mga kaisipán, nga ang ila dalagkò nga mga paglaum gin lag-it paagi sa dalagkò nga sugid kag diutay nga binuhatan: sang wala pa si don Custodio, may madamò na, madamò kaayo!
Sa tungâ sang kadak-an kag sa idalum sang mga parol nga mapulá, makità ang apat ka latók nga manipulon, nga napamutáng nga alangay ang antad sa isá kag isá sa banhay nga kwadrado; gingamit nga pulungkòan ang mga bangkito nga kahoy nga manipulon man. Sa tungâ sang tagsa ka latók, sunô sa paggamit sang restawran, may nabutáng nga apat ka pastel, kag may apat ka tasa nga tsa nga may mga tabóon, nga lunsay porselana nga mapulá; sa atubangan sang tagsa ka pulungkòan, may isá ka botelya kag duhá ka kopa nga masinaw nga kristal.
Si Sandoval, sa iya pagka-maniningád, nagtan-aw, nag-usisà sang tanán, gintilawan niya ang mga pastel, ginsusi ang mga kwadrong' naduagán, ginbasa niya ang lista sang mga bilí. Ang ibán naghinambalhambal sang mga butáng nga gin-hambalán sang amó nga adlaw, nahanungód sa mga artistang' babae sang Operetang' pransesa kag ang makatilingala nga pagmasakit ni Simoun nga sunô sa pila nga nagsugid, nasapwan siá nga pilasón sa dalan; sunô man sa ibán, naghumót siá sa paghikog. Apang ang tanan nga sugid natapos sa mga pagpakutpakot. Si Tadeo nagsugid sing iya sing laín, nga sunô sa iya, kinuha niya sa isá ka maayo nga salaligan. Si Simoun gin-away sang isá nga walâ makilal-i sa dumaan nga plasa sang Vivac; ang mga kabangdanan amó ang dumót, kag sa pagkamatuod sina si Simoun nga taglawas indì maghatag sing bisán diutay nga kasaysayan. Tungód sini naghalambal silá sang mga dumót nga tinagò, kag subong man sang mga ginhimò sang
