Isá ka tinig-apát nga binalaybay, sa dalagkò nga mga tig-bató nga maitúm, nasulát sa ibabáw sang kadak-an nga nag-silíng:
- Ang tagpangulo sining' kalan-an
- Gapahanumdom sa tanán
- Nga walâ sing ibilin maskin anó mán
Sa ibabaw latók kag pulungkòan.
-Sapák ka sinâ nga patimaan!-singgit ni Sandoval. Daw may pagsalig siá sa mga polis ha? Kag anó nga binalaybay! Daw si don Tiburcio nga ginhimò nga tinag-apát, duhá ka tííl, ang isá malaba sangsa isá, sa tungâ sang duhá ka tukód! Kon makità inâ ni Isagani, idulot niya sa iya palaabuton nga tiyà!
- Yari si Isagani!sabát sang isá ka tingog kutob sahagdanan.
Kag ang masinadyahon nga pamatan-on nagpakita nga punô sing kalipay, nga ginsunód sang duhá ka nagauba nga insik nga nagdalá sang dalagkò nga mga bandeha diín nag-alisbong ang makaililà nga bahù sang mga pagkaon. Malipayon nga mga panamyaw ang nagsumalang sa ila.
Wala pa si Juanito Pelaez, labot pa nagligad na ang taknà naglilingkod silá palibot sa mga latók sing masinadyahon. Si Juanito sa gihapon indì pormal.
-Kon tigaylo sa iya gin-agda naton si Basilio, siling ni Tadeo,- malingáw pa gid kitá. Hubugón naton siá agúd makakuhà sa iya sing pilá ka likúm.
- Anó? Ang mahinalungon nga Basilio may mga tinagò?
-Hinugay! sabát ni Tadeo, kag labing' kinahang lanon sa tanán! May mga tinagò nga ang ibán sa ila siá lamang ang nakahibaló... ang batà nadulà, ang mongha...
- Mga ginuo, ang pansit langlang, isá ka sinabawán nga manamit gid! - singgit ni Makaraig. -Makità mo Sandoval may lakót nga mga uhong, mga uson, ukón mga pasayan, binatí nga itlog, sotanghon, mga hiniwà nga manók kag ibán pa nga nahibal-an ko. Bilang panguna, tanyagán naton si don
