-Tubtob sini'ng karón, mga ginuo, padayon niya, ang pansit ginapatihan nga ila sang mga insík ukón sang mga haponés, apang ang matuod nga walâ makilal-i bisán sa China ukón sa Japon, gani nga ayhan pilipinhon, apang wala'y sapayán ang nagahimò kag nagahimulós amó ang mga insik: amó man tanán ang nagakahanabò sa Pangulohán kag sa Filipinas: silá daw mga insik, apang kon silá amó ukón indì amó, may mga doktor ang Balaan nga Iloy... Ang tanán nagakaon kag naluyagan nila, kag wala'y sapayán ginbilang nila nga pagkaon nga alì kag malain; amó man ang nagakahanabò sa pungsod, subong man sa Pangulohán. Ang tanán nagakabuhî sa iya, ang tanan nagapakig-ambit sang badù kag pagkatapos walâ sing pungsod nga labí kalain sangsa Filipinas, walâ sing pangulohan nga labí kagumón; gani nga ihalad naton ang pansit sa pungsod kag sa Pangulohán!
- - Ginahalad!-silíng nila nga dulongan.
- -Nagapamatok akó! sabát ni Isagani.
- - Katahurán sa mga kubós, katahurán sa mga natungdan! singgit ni Pecson sa tingog nga hungáw samtang nagabatak sa ibabaw sang isá ka tul-an sang manók.
-Ihalad naton ang pansit kay insik Quiroga, isá sang apat ka gamhanan sa kalibutan nga pilipinhon! -hingyù ni Isagani.
Indì, sa Taslangdon nga Itúm!
-Maglinóng! - singgit sang isá sa likúm.- Sa plasa may mga gubán nga nagatulok sa aton kag ang mga dingding nagapamatî.
Sa pagkamatuod ang mga gubán nga natingala nagdululog sa atubangan sang mga bintanà, samtang ang kinagahod kag kinadlaw sa sulód sang mga balaligyàan nga kaingod lunsay nag-untat, nga daw nagtalupangod silá sa mga nagkahanabò sa sinalusalo. Ang kalinóng may pagka-tumalagsahon.
-Tadeo. magpamulongpulong ka! -hutík sa iya ni Makaraig.
Ginkaisahan nga si Sandoval, sanglit amó ang may labing' kinaadman sa pagka-manogpamulongpulong, amó ang mahatag sang hingapusán nga mga tinagâ.
