Si Tadeo, nga may ugali sa pagka-mapinatumbayàon gihapon walâ sing naaman kag nabutáng siá sa ital-ital. Samtang nagsuyop siá sang isá ka malabà nga sotanghon, nanghunâhonà siá kon anó ang pagpanginlwás niya sa ital-ital, tubtob nga nadumdomán niya ang isá ka pamulongpulong nga natun-an niya sa klase kag ginlalangán niya ang pag-ilóg kag pagliwát sang ibán nga bahin.
--Minamahal ko nga mga utod sa proyekto! sugod niya nga naghagyò sang duhá ka kimpit sa pagkaon nga ginagamit sang mga insik.
- Animal! Ipahilayo ang duhá ka kimpit gin-ukay mo ang akon buhók! -hambal sang isá niya ka kaingod.
-"Gintawág sang inyo pagpili sa pagsulód sang luáng nga ginbilin sa..."
- Inilóg!-tublag sa iya ni Sandoval. Inâ nga pamulongpulong iya sang pangulo sang amon Liceo!
- "Gintawag sang inyo pagpilì, padayon niya nga wala magpatublag, sa pagsulód sang luáng nga ginbilin sa akon... panumdoman (kag tinudlò niya ang iya tiyán) sang isá ka lalaki nga maalam nahanungód sang iya pagsulondan sa pagkakristuhanon kag sa iya mga kaisipán kag mga proyekto nga bagay nga pagpanumdumón, anó ang mahambal sa inyo sang isá nga katulad nakon, akó nga may tuman nga kagutom tungód nga wala pa ako makapamahaw?"
Batuna ang isá ka ilog, itsooy! -silíng sa iya sang iya katupad nga nagtanyag sa iya sang isá ka liog sang manók.
"May isá ka pinggan, mga ginuo, nga manggad sang isá ka banwa nga karón sulugiron kag ginakaham-után sa dutà, diín matusmog sang ila gutóm nga kutsara ang labing' dalagkò nga mga hakugán gikan sa kadutàan nga katundanon sang kalibutan," -nga iya gintudlò sang iya mga kimpit si Sandoval nga nagapang-it sang isá ka pakpak sang manók.
-Kag mga sidlanganon! sabát sang gintudlò nga naghagyò sang pakpak sang manók sa utbong sang isá ka tenedor nga iya ginpatiyugtiyog agúd mahangpan sang tanan nga nagkinaon.
-Waáy pulós ang mga pagtublag!
- Ginapangayo ko ang paghambal!
