- Ginapangayô ko ang patís! -sugpon ni Isagani.
-Dal-on na diri ang lumpyà!
Ang tanan nangayò sang lumpyà kag si Tadeo bumatyag nga nalipay kaayo nga nakalwás siá sa ital-ital.
Ang linutò nga ginhalad kay P. Irene daw walâ pagbantugá, kag si Sandoval naghambal nahanungód sinâ sing masakít:
-Nagahininghining sing mantekà sa gwâ kag may baboy sa sulód! Dal-on na dirí ang ikatlo nga linutò, ang torta sang mga prayle!
Ang torta wala pa malutò; nabatián ang sirit sang mantekà sa kalahà. Samtang naghulát silá ginhimuslan nila ang paginúm kag pinangayò nila nga maghambal si Pecson. Si Pecson nagpangurós sing maligdong, tumindog siá nga sa dakú nga kabudlay pinunggan niya ang iya linangás nga ka.adlawon, kag gin-ilóg niya ang isá ka Agustinong mangwawali nga sadto bantog, nagsugod siá sa pagkibot nga daw iya ginluwa ang isá ka walalihón.
"Si Tripa plena laudat Deum, tripa famelica laudabit fratres: kon punô ang tinai nagadayaw sa Dios, kon gutóm ang tinai nagadayaw sa mga prayle. Mga tinagâ nga ginhambal ni ginuong Custodio paagi sa bàbà ni Ben Zayb, sa pamantalaan nga El Grito de la Integridad, ikaduhá nga artikulo, kabuangan nga isá ka gatós kag kalim-an kag pitó:
"Minamahal nga mga utod sa ngalan ni Jesucristo!
"Ang malain nagahuyóp sang iya mahigkò nga gininhawan sa lunhaw nga mga baybayon sang Frailandia. nga sang kadam-an ginatawag nga Kapulòán nga pilipinhon! Walâ pagdilag ang adlaw nga walâ sing mabatián nga isá ka pag-pakalaot. nga indi mabatián ang isa ka pagtamay batok sa mga parì, sa mga tinatahod kag mga gubán sang mga kumboyahan sa pagtuluohan, nga indi makapangapin kag nawad-an sing tanán nga bulig. Tugoti akó, mga utod. nga sa isa ka tión akó mangín-isá ka isganán sa pag-apin sa mga wala'y umalapin. sa mga balaan nga kumboyahan nga naghatag sa aton sing pagtulon-an, nga liwat nagapamatuod sang kaisipan nga makapahimpit sang hurubaton, nga ang tinai nga punô nagadayaw sa Dios, nga amó, ang tinai nga gutóm nagadayaw sa mga prayle."
