Nabawi ni Basilio ang iya katawhay.
-Gani ano ang nahanabò? -pangahás niya sa pagpamangkot.
- May nakità silá nga mga pamaskin batok sa mga punòan, wala ka sinâ makahibaló?
- Diín?
- Nga yawir!... Sa Unibersidad.
-Walâ na sing liwan sinâ?
- Anó pa ang luyag mo? pamangkot sang propesor nga daw naakig. Ang mga pamaskin ginapabangód sa mga katapò nga tumoluon, apang, hipsi!
Sumampot ang Propesor sa Patolohiya,1 isá ka tawo nga may nawóng sang sakristan sangsa isá ka médiko. Ginbutáng sa iya palangakòan sa labing makagagabum nga kabubut-on sang Bise Rektor, nga walâ siá pagpangayòi sing dugang nga mga pamatuod sang ikasangkol kag mga título kundi ang wala'y kabilinggan nga pagpasakop sa kumboyahan sang pagtuluohan. ginkilala nga isá ka maniniíd kag manogsuplet sa mga matá sang ibán nga mga propesor sa ila Gubán sa Unibersidad.
Ang nahauná nga propesor nagsabát sang iya katahurán sing mabugnaw kag nangiláy kay Basilio, naghambal sa iya sing mabaskog:
Nahibal-an na nakon nga si Kpn. Tiago may bahù na sang bangkay; ang mga uwák kag mga banugón nagduloaw sa iya.
Kag nagsulód siá sa kadak-an sang mga propesor.
Nagdugang ang katawhay sang iya balatyagon, si Basilio nagpadayon sa pagpangusisà sang ibán nga tagdiutay nga hilisayran. Ang tanan nga iya lamang masayran nga nakita nila ang mga pamaskin sa mga ganhàan sang Unibersidad, mga pamaskin nga ginpakakás sang Bise Rektor agúd mapadalá sa
_________________
1 Patologia - Ang kinaalam nahanungod sa mga balatian, ang ila ugali, kahangdanan kag pagtubo, kag ang pagliwat sang kahimtangan, kag paghulag sang lawas nga ila mahima.
2 Agúd mahimo nga propesor sa Unibersidad sang Manila indi na kinahanglan nga pagpilion ang magpangako, bisán pagpangitaan sing titulo sa pag- ka-doktor: ang pilá ka ahéw nga mga tumoluo nga kaupod sa mga dominíko ila ginhuray ang mga palangakoan sa pagka-propesor, nagsululód sa Unibersidad nga wala sing ikasaráng kundi nga ginpili lamang sang mga prayle. Gani nga indi diutay ang mga wala'y pulós se amó nga gubán sang mga propesor.
