—Daw nakakità akó ... nangluthang kamí sinâ sa linaw, —sabát ni Ben Zayb nga natingala.
—Indi, wala ako nagahambal sang mga pato nga ihalas, nagahambal akó sang mga hinuptan, sang mga ginapabuad sa Pateros kag sa Pasig. Kag nakahibaló ikáw kon sa anó silá mabuhì?
Si Ben Zayb, ang ulo nga amó lamang ang makahibaló maghunâhonà, walâ sinâ makasayod: walâ siá makahimò sinâ nga palangitan-an.
—Sa mga tulya,13 nga tawo iní, sa mga tulya! sabát ni P. Camorra. — Indi kinahanglan nga mangin-indyo sa paghibaló sinâ, tuman na nga ikaw may mga matá!
—Matuod, mga tulya!— sulit ni Dn. Custodio nga hinagyò niya ang iya tudlò.— Kag nakasayod ka kon diín nila ginakuhà? Ang ulo nga manoghunâhonà walâ man sinâ makasayod.
—Kon abi nakapuyô ka dirí sa pungsod sing tinuig subong sa akon, mahibal-an nimo nga ginakuhà nila dirâ man sa bahura diín may madamò sinâ nga nagasamò sa balás.
—Kag ang imo proyekto?
—Makadto akó dirâ. Piliton ko ang tanan nga banwa palibot, nga malapit sa bahura, sa pagsagód sing mga pato, kag tan-awón mo silá, nga sa ila kaugalingon, mapadalum nila ang bahura sa pagpanguhà sang mga tulya. Wala'y kapin wala'y kulang, wala'y kulang wala'y kapín.
Kag hinitad ni Dn. Custodio ang duhá niya ka butkon kag tinulok niya nga nalipay sa kahayanghag sang iya mga manogpalamatî: walâ makaabót sa bisán kay sin-o sa ila ang amó nga kaisipán.
—Mapahanugotan mo akó nga magsulát akó nahanungód sinâ? pamangkot ni Ben Zayb. —Sa siní nga pungsod diutay lamang ang makahunâhonà . . .
—Apang. Dn. Custodio, —silíng ni donya Victorina nga nagpangyam-id kag nagkuriít kon ang tanán magsagód sing mga pato magdamò ang mga itlog nga ba'ót.14 Uy, daw anó kadamák! Dapat dumilian anay ang pagsulód sa bahura!
__________________
13 Tulya- Isá ka sari sang pakinhason sa katagalogan.
14... itlog nga balót Ang itlog sang pato nga ginapalumlomán kag ginatanók kag ginakaon. Sa mga katsila ginabilang ini nga tuman kahigko; apang may mga europanhon man nga maluyag magkaon siní, nga sang ila matilawán, isá kuno ka pagkaon nga tuman kanamit. Si Donya Victorina, sa iya luyag nga pagtawgon nga isá siá ka katsilang babae sa tanan nga bagay, ginhigkoán sang itlog nga balót.
