DIDTO SA UBOS nagkahanabò ang ibán nga mga talan- awon.
Nagpulungkò sa mga bangkù kag sa magagmay nga mga taburete nga kahoy, sa tungâ sang mga maleta, mga kahón, mga alát kag mga tampipì nga duhá ka tapak halín sa mákina. sa luyó sang mainit nga mga kaldera, sa tungâ sang alisngaw sang mga tawo kag makalilingin nga bahù sang langis, makità ang tuman nga kadamùón sang mga sumalakay.
Ang ibán nagpanglantawlantaw sang nagkalainlain nga mga talan-awon sa baybayon, ang ibán naghinampang sang mga baraha ukón nagsinugilanon sa tungâ sang hinuganas sang mga pala, kagansal sang mákina, mga paós nga panitsit sang asó nga naggwâ, mga gahod sang tubig nga ginsag-a, mga pamito sang bosina. Sa isá ka higád, nagtumpok katulad sang mga bangkay, nagkalatulóg ukón daw nagtululog ang pilá ka insik nga manoglibód, gindagát, mga maluspì, nagbulâ ang ila mga bibig nga nagbukâ kag nagpaligô silá sa ila mapilit nga balhas nga naggwâ sa tanán nga buhôbuhô sang ila mga panit. Ang pilá lamang ka pamatan-on, nga ang kalabanan mga bumoluthò, mahapós makilala sa ila mga panapót nga tuman kaputi kag sa ila mahipid nga gawi, naglinibutlibot halín sa popa pakadto sa pruwa, nga naglulompat sa mga alát kag mga kahón, nga nagbalatyag sing kalipay sa pagpanumdom sang naghilapít nga mga pagpaliwaliwa. Nián ginhambalán nila ang mga hulag sang makina nga ila ginpanumdom ang nalimtan na nga mga butang nahanungód sang Fisica,1 samtang nga ginlibutan nila ang isá ka pamatan-on nga kolehiyala, ang isú ka manogbaligyà-buyò nga may mapulá nga mga bibig kag
1 Física — Ang kinaalam nahanungód sa duna nga paghumán sang mga butáng.
