—Gg. Isagani,— hambal sang dominiko nga tinan-ay niya sa iya ang iya kamót,— bisán nga sa sini nga pagsugilanonáy daw walâ sing may naggwâ nga butang nga saráng mahimò, wala'y sapayán may diutay nga nakuhà; mahambal ako sa akon mga utod nahanungód sang imo ginhambal sa akon kag ginasaligan ko nga may butáng nga saráng mahimò. Ginakahadlukán ko lamang nga indì silá magpati sa imo pagkabuhî...
— Amó man ang ginakahadlukán ko, sabát ni Isagani nga dinawat niya ang kamót sang dominíko, —ginakahadlukán ko nga ang akon mga abyan indì magpati sa imo man pagkabuhi, subong man karón nga ginapakità mo sa akon.
Kag ang pamatan-on. nga nagbilang nga ang pagsugilanonáy natapos na, nagpaalam.
Binuksan ni P. Fernandez. ang ganhaan sa iya, sinunod siá sang iya mga matá tubtob nga nakità niya siá nga nawalà sang iya paglikô sa pasilyo. Madugay nga iya ginpamatian ang lagpok sang iya mga tikáng, sang ulihe sumulód sa iya hulót kag ginhulát niya nga maggwâ ang pamatan-on sa dalan. Sa pagkatutuo, nakita niya siá, nabatián niya nga naghambal sa isá niya ka kaupod nga namangkot sa iya kon diín siá makadto:
— Sa Pangulohan Sibíl! Tan-awón ko ang mga pamaskin kag mabuylog ako sa ibán!
Ang iya kaupod, kinulbàán, naurongán nga nagtulok sa iya nga daw nagtulok sa isá nga magahikog kag nagpalayô nga dumalagan.
_______________
1 Si Rizal nagapahanungod sa iya man kaugaligon. Ang iya mga gina- tudlo, sa katuyoán nga magpasulód sang mga balatyagan sa pagkadungganon sa iya mga kasimanwa, pilá ang gintugahan niya sing mga malain nga buót? Sa ibabaw sang tanán, wala kitá nagapati sa pagkamatuod sini nga sinabtanay, nga ginpatok sang Tagsulat sa pagsabat sang mga pangatarungan sang mga prayle. Ang bugal nila sini nga indi sila magoahanugot nga may isa ka Isagani nga maghambal sa ila sing tampad sang kamatuoran. Ang pagpatok kay Pari Fernandez, bilang propesor nga dominiko, isa ka kabubut-on sa kaalwan ni Rizal,nga nagpasugót nga sarang mahanabo nga may isa ka prayle nga sarang makapakigbais sing matarong sa isa ka indyo.
