Sa paghunong kay Basilio kag sa pangusisà nga ginhimò sang ulihe sa iya mga tulon-an kag mga papel, si Kapitan Tiago naglain pa gid. Karón nag-abót si P. Irene sa pagdugang sang iya kahadlok sa mga sugilanon nga makakulogmat. Naggahúm sa kailó ang indi masugid nga kahadlok, nga sa nahauná nagpakità sa diutay nga pagpalangurog, nga nagdugang sing madasig tubtob nga sang ulihe indì na siá makahambal. Naghumlad ang iya mga matá, ginbahulay ang iya agtang, nag-uyat siá sa butkon ni P. Irene, nga buót matindog, apang indi niya mahimò kag, makaduhá síá umugayong, nahulog siá nga ang iya lawas tumopâ sa ulonan Nagmuklat ang mga matá ni Kapitan Tiago kag nagbulâ: patay na siá. Kinugmat, si P. Irene nagdalagan kag, sanglit ang bangkay naghawid sa iya, sa iya pagdalagan nalalás niya sa lwás sang kama, nga binayàan niya sa tungâ sang hulót.
Sang pagkagab-i ang kakugmat naglambot sa katimpusan. May pilá ka hitabô nga nagpapati sa mga mahadlukon sang ginhimò sang mga manogsugyot. Sa paghiwat sang isá ka pabunyag, ginsabwag ang kwarta sa kabataan kag nahanabò gid. lang ang kinagulà sa ganhàan sang simbahan. Natabòán nga nakalabáy didto ang isá ka maisog nga soldado nga, daw natingala, naghunâhonà nga ang nagkinagulà mga mabinatukon, kag hinunos niya ang sable nga hinamag ang kabataan, sumulód sa simbahan kag kon walâ siá mapukot sa kortina nga nagtunton kutob sa Koro,7 indi niya pag-ibilin sa sulód títeres nga may ulo. Nakità iní sang mga mahadlukon kag nagdinalagan nga nagpasayod nga ang ribók nagsugod na, sang isá lamang ka tión. Tinakpan sing padali ang pilá ka balaligyàan nga nabuksan pa, may mga insik nga nagbiyà sa lwás sang mga pinyesa nga tela, kag indi diutay nga kababaen-an ang nadulàan sing mga tsinelas sa pagdalagan sa mga dalan. Sa maayo nga palad may isá lamang nga napilas kag pilá nga nabagrasán. ang isá sa ila amó man ang soldado sang mahulog nga nagpanginlwás sa kortina, nga may kabahò sang kunop sang pagkamabinatukon. Inâ nga kaisog naghatag sa iya sing tuman nga kabantugan kag isá ka kabantugan aga putli kaayo kag kabáy pa nga ang tanan nga kabantugan matigayon sa amó man nga
7 Kora- Isá ka balkonahe sa sulod sang simbahan diin nagatipon ang mga manog-amba sa misa.
