— Wala ako nagapati sa mga pamaskin! — hambal sang isá ka mamumugon nga maniwang kag nahuyós na sang huyóp sang talayhop. Sa akon lang, padihot inâ ni P. Salví.
— Ehem, ehem! — Ubóubó sang manunudlong platero, tawo nga tuman ka mahinalungon nga, nahadlok bilangon nga matalaw, walâ magpangahás sa pag-utód sang sugilanon. Ang but-anan nga tawo nag-ubó lamang, nagpangiláy sa iya mamumugón kag nagtulok sa dalan, nga daw masilíng sa iya:— Saráng nila kitá mapanilagan!
— Nahanungód sa opereta! — padayon sang mamumugón.
—Uho!— hinali nga tinugdà sang isá nga may nawóng sang wala'y buót. Inâ ginsiling ko na! Gani nga...
—Hm!— sabát sang isá ka eskribyente sa tingog nga may kaluoy.— Ang nahanungód sa mga pamaskin matuod, Chichoy, apang hatagan ko ikaw sang iya kasaysayan!
Kag sinugponán niya sa tingog nga ginhutík:
— Isá ka hampang ni insik Quiroga!
—Ehem, ehem! —ubóubó uli sang manunudlò nga ginpasaylusaylo niya ang upà sang buyò sa pihák kag pihák sang iya pisngi.
—Patiha akó, Chichoy, iya ai insik Quiroga! Nabatìán ko inâ sa talatapán!
—Nakú, matuod inâ!—hambal sang lungóslungós, nga nagpati sinâ sadto nga daan.
—Si Quiroga, —padayon sang eskribyente,— may isá ka gatós ka libo ka pesos nga pilak nga mehikanhon sa bahiya. Ano ang pagpasulód sini? Hanti mahapós; padihutan niya ang pagpamaskin, nga himuslan ang butang nahanungód sa mga tumoluon, kag samtang ang tanan nagakinagulà, pum! Padanlugán niya ang mga alagád kag maagi ang mga kaha!
—Matuod, matuod! —hambal sang nagpati nga pinugsak niya ang iya inumol sa ibabaw sang latók. —Matuod! Ganì nga si insik Quiroga... gani nga...!—Kag naghipos siá nga walâ siá sing nahibal-an nga ihambal nahanungód kay insik Quiroga.
—Kag kami ang mabayad sang mga pinggan nga nagkabuong?... Pamangkot ni Chichoy nga naakig.
