—Ehem, ehem, ehehem! —ubó sang platero nga ginpamatian niya ang naghilapít nga mga tikáng sa dalan.
Matuod, ang mga tikáng naghilapít, kag sa sulód sang platerya ang tanan naghilipos.
—Si San Pascual Bailon isá ka daku nga santos, — siling sang platero sa dakû nga tingog, nga nagpangilay sa ibán, San Pascual Bailon...
Sa amó nga tión nagtanghaw ang guyá ni Plácido Penitente, nga ginbuylogán sang manoghimò sang mga palalukpon nga nakita naton nga nagbaton sang mga sugo ni Simoun. Ang tanan naglilibot sa mga bag-o lang magsampot nga namangkutanon sang mga balità.
— Wala ako makahambal sa mga binilanggò, — sabát ni Plácido. —May mga katloán silá!
—Magbantay kamó! —sugpon sang manoghimò-palalukpon, nga nagpasiplat sing halangpon kay Plácido.—Siling nila karón sa gab-i may gulgolay sang mga puwak...
—Ha? Lintì! —may kakugmat nga namitlang ni Chichoy, nga ginpangità sang iya mga matá ang isa ka hinangiban, kag walâ sia sing nakità, kinuha niya ang iya talayhop.
Ang manunudlò nagpungkò; nagpalangurog ang iya mga tuhod. Ang nagpati nagpanan-aw nga ginpugotan na sia kag naghibî na nga daan sa kapalaran sang iya panimaláy.
—Indi mahimo! — hambal sang eskribyente. — Ang pangulgol indi mahanabò! ang palamangkutan sang... kag naghagyò sia sing tagù...sa maayo nga palad nagamasakit. liwat
—Si Simoun!
— Ehem, ehem ehhhem!
Si Plácido kag ang manoghimò-palalukpon nagtulokáy
—Kon walâ magmasakit inâ...
—Ginapadihot ang isá ka ribók! -sugpon nga pasapayán sang manoghimò palaluk pon, nga nagsindi sing sigarilyo sa kingke.— Hanti anó ang himùon naton?
—Hanti himùon na gid sing matuodtuod, kay pugotan na nila kitá sing ulo...
