Sa balay sang namatay, diín nagdulugok sang madasón nga adlaw ang dumaan nga mga abyan kag mga kilala, madamò ang ginhambal nahanungód sang isá ka milagro. Ginsugid nga sang tión nga naghimumugtò siá, ang kalag ni Kapitan Tiago nagpakità sa mga mongha, nga gin-ubongan sang masili nga kasanag. Ginlwás siá sang Dios, salamat sa madamò nga misa nga iya ginpahiwat kag sa matinuohon nga mga tiglawas sa pagtuluohan. Ang hinuringhoring ginhambalán, gindugangdogangan, nahimò nga pat-od nga balità kag walâ sing nagpangduhadoha. Ginasoy ang panapót ni Kpn. Tiago, ginkunókuno ang prak, ang pisngi nga naghabok sa upà sang buyò, nga wala pagkalimti ang hunsoy sa iya pagtabakô sang apyan subong man ang manók nga ingobuláng. Ang sakristan mayor nga didto sa gubán, nagpamatuod sing maligdong ngal naghangdò, kag naghunâhonà nga, sang mapatáy siá, magapakità siá nga nagauyat sang isá ka tasa nga tabû nga masinaw kay, kon walâ sini nga ilimnon sa pamahaw sa aga, indi niya mahangpan ang himayà bisán sa langit ukón sa dutà. Nahanungód sini nga halambalanon kag tungód nga walâ mahambalí ang mga nagkahanabò sang nagligad nga adlw kag didto may mga tahur, madamò nga makatilingala nga mga pangduhadoha ang ginpatok, ginpakutpakot kon balá si Kapitan Tiago maagda ukón indì kay San Pedro sa isá ka soltada, kon balá mapustahanay silá, kag kon ang mga manók mangín wala'y kamatayon. kon indi mapilasan, kag tungód siní, sin-o ayhan ang mangin-sentensyador, sin-o ang madaóg kbp. mga binaisbais nga naluyagan gid sang mga tagpatok sang mga syensya, mga painuino, mga padugi nga pinasandig sa isá ka balasahón nga ginbantog nga walâ pagsayóp, papahayag na ukón kaisipan nga ginapatihan nga matuod. Ginsambit pa.. ang mga bahin sang mga nobena, mga libro sa milagro, mga sugid sang mga kura, mga panaysayon sang langit kag ibán pa nga indi salapakon nga mga butáng. Si don Primitivo, nga pilosopo, puno sing himayà nga nagsambit sang mga kaisipán sang mga teólogo.
