This page has been proofread.
329
naghingyò sang sotana sang isá ka pransiskano; may iya manganì siá, daan, ugis kag tinukapan, malahalon nga panaptonnga, sunô sa prayle nga naghatag sa iya bilang limós sa baylo sang katloán kag anum ka pesos, magatipig sa bangkay batok sa mga dabdab sang kalayo sa impyerno, kag sinugid niya sa pagpamatuod ang nagkalainlain nga mga sugid sa pagtuluohan nga kinuhà sa mga libro nga ginpanagtag sang mga kura. Si Kapitán Tinong, maskin nga ginpakamahál gid niya inâ nga handumanan, may kabubut-on siá sa paghatag sinâ sa iya mahirop nga abyan, nga walâ niya maduaw sang iya pagmasakit. Apang ang isá ka mananahì nagpamatok sing mabakod nga, sanglit nakità sang mga mongha si Kapitán Tiago nga nagsakà sa langit nga nagsuót sing prak, dapat nga magpanapót siá sing prak dirí sa dutà kag walâ na kinahanglan ang mga pagpanipig kag mga panapót batok sa kalayo; nagsuót siá sing prak kon magkadto sa saut, sa isá ka pandot, kag indì sa ibán nga bagay nga paghulatón siá didto sa langit... kag tan-awón ninyo! Tabu man nga may iya siá nga humán, nga sarang niya mahatag sa katloán kag duhá ka pesos, nga kubós sing apat ka pesos sangsa sotana sang pransiskano, kay sa kay Kapitan Tiago indi siá maluyag nga magsaplid sing maskin pilá: suki niya siá sang buhî pa kag karón sukì man niya tubtob sa langit! Apang si P. Irene, nga tagbuót sang palanublion, nagsikway sang isá kag isá ka hingyù kag nagsugò nga pasuotan ang bangkay sang maskin anó niya nga mga panapót nga daan, ngi naghambal sa tinagâ nga balaanon nga ang Dios walâ pagtalupangod sang mga pagpanapót.
Hanti, ang pagpalubong sa iya, hiwaton sa labing' maayo nga bagay. May mga responso sa baláy, sa dalan, nag-alagád ang tatlo ka prayle, nga ang isá daw indì makaigê sa iya kalág, ginhiwat ang tanan nga hiliwatón nga sarang mahimò, kag ginbantog nga may ginpadihot pa nga ibán, nga may mga ekstra katulad sang mga benepisyo sa mga teatro. Yadto isá ka kalingawan: ginsunog nila ang madamò nga insenso, madamò nga linatín ang gin-amba, madamò nga tubig nga nabenditahan ang gingamit — si P. Irene bilang halad sa iya abyan nag-amba sa tingog nga nagkurog sang Dies Irae, kutob sa koro — kag ang mga nagbuluylog bumatyag sing tuman nga sakit sa ulo sa pagsagad dukô sa patáy.
