sinâ sing madamò. Ang mga insik, ang mga insik nga wala
makahibaló sing bisán isá ka tagâ nga linatín! A, kon si
Kapitan Tiago nakatuón lamang kay Ciceron!...
Kag ang kalain sang buót nga kapin ka pinasahî lumotáw sa iya epikuryong' nawong4 nga nabarbasán sing maayo. Tinulok siá ni Isagani sing unáy: inâ nga tawo nag-antos sang balatyagon sa nagliligad.
—Apang mabalik kitá sa sinâ nga Akademya sa Kinatsilâ, — padayon ni Kapitán Basilio. Ipasalig ko sa inyo nga indi inâ matigayon...
—Huo ginuo, adlaw adlaw ginahulát namon ang pahanugot, sabát ni Isagani.— Si P. Irene, nga nakità nimo sa ibabaw, kag gindulotan namon sing isá ka pares ng kabayo nga pulá, nagtug-an sinâ sa amon. Mapakigkità siá sa Heneral.
—Bisán pa. —Si P. Sibyla namatok!
—Papamatuka! Gani man nga nagkarí siá sa pag... sa Los Baños, sa atubangan sang Heneral.
Kag ang bumoluthò nga si Basilio nag-umol sang iya duhá ka kamót nga iya ginpukol.
— Nahangpan ko! —hambal ni Kpn. Basilio nga nagkadlaw.— Apang bisán matigayon ninyo ang pahanugot, diín kamó makuhà sing hilinguyangon...?
—May amon kamí, ginuo; ang tagsa ka tumoluon maamot sing isá ka real.
—Apang, kag ang mga propesor?
—May amon man kamí; ang katungâ mga pilipinhon kag ang katungâ mga tagá-península.
— Kag ang baláy?
—Si Makaraig, ang manggaranon nga Makaraig mahatag sang isá niya ka baláy.
Si Kapitan Basilio nagkilala nga linutos siá; ang amó nga mga pamatan-on may nahandà sang tanán.
—Sa ibán,— hambal niya nga pumakinhol sang iya mga abaga, —indì malain ang tanán, indì malain ang kaisipán, kag karón kay indi na matun-an ang latín, sa magkubós ang
_____________
4 Epikuryong' nawong- Tawo nga nagapakita sa iya guyá sing ugali nga siú mapili ukón delikado sa mga butang nga kinahanglan niya.
