Kag nagsugid kon paano nga nag-ayo siá nga walâ matunawi nga nagbasâ lamang sang iya pusod sing nabenditahan nga tubig samtang nga nagpangadi siá sang Sanctus Deus, kag nagpanugyan sang amó man nga bulóng sa mga nag-antos sang panlibáng kag hinampak sang hangin ukón sang maghimugasà ang pameste: lamang nga silá dapat magpangadi sa kinatsilâ sang:
- Santo Dios
- Santo fuerte
- Santo inmortal
- Libranos señor de la peste
- Y de todo mal.
— Ang bulong walâ pagsayóp; apang kinahanglan ibutáng ang nabenditahan nga tubig sa bahin nga masakit ukón may balatian,— siling niya.
Apang madamò nga tawo ang walâ pagpati sini nga mga butáng bisán magpahanungód sang pagbilanggo kay Basilio sa silot sang Dios. Walâ man silá pagpati sa mga kinagubot bisán sa mga pagpamaskin, kay nahibal-an ang pamatasan nga tuman ka mahidaiton kag mahalungon sang tumoluon, kag ginpasulabi nila ang pagpahanungód sa mga pagtimalós sang mga prayle, tungód sang pagkuhà sa pagkaulipon kay Julí, nga anák sang tulisán, kaaway tubtob sa kamatayon sang isá ka gamhanan nga kumboyahan. Kag sanglit may tuman silá kalain nga panghunâhonà nahanungód sa katarong sang amó nga kumboyahan kag nadumdomán ang tagdiutay nga mga paghingabót, ang pangduhadoha ginpatihan nga may tuman nga kamatuoran kag ginpakatarong.
—Maayo ang nahimò ko nga pinahalín ko siá sa akon balay! siling ni utod Penchang. — Indi akó maluyag nga maglainay kami sang mga prayle, gani nga ginsakò ko siá sa pagpangità sing kwarta.
Ang matuod nga ginkasub-an niya ang paghilway kay Julí: si Julí ang nagpangadi kag nagpuasa tuhoy sa iya, kag kon may nabilín pa nga panahón naghiwat man siá sing isá ka buhat sa paghinulsol nabanungód sa iya. Ngaa man, kon ang mga kura nagapalangadi nahanungod sa aton kag si Cristo na-
