Ang amó nga balità natapos sa tanán nga pagpangduha-doha sang pamatan-on nga dalaga nga ang iya panumdoman, labot pa, nalapyò na kaayo tungód sang madamò nga mga gab-i sang pagpuláw kag sa iya makahaladlok nga mga damguhanon. Maluspad kag ang iya mga matá nagtilik, ginpangità niya si Utod Bali kag, sa tingog nga naghatag sing kahadlok, ginsingganan niya siá nga luyag na siá magkadto sa kombento kag pinangkot niya kon luyag niya siá nga updan.
Si Utod Bali nalipay kag gintinguhàán niya ang pagpalinóng sa iya, apang si Juli walâ magpamatì kag lamang nga daw nagdalî siá sa pagdangat sa kombento. Nanghipid siá, ginsuót niya ang iya labing' maayo nga mga panapton kag tubtob nga daw nahakunyag siá kaayo. Madamò ang iya ginhambal bisán nga daw walâ pag-alangot.
Naglakát na silá. Si Julí ang nauna kag bumatyag sing kataká kay ang iya kaupod nabilín sa ulihé. Apang samtang nga naghilapít silá sa banwa, ang kusóg sang iya lawas sa kakibáng nag-amát-amát kawalà, liwát nga naghipos siá, nadulàan siá sing luyag, naghinay ang iya tikáng kag sang ulihe nagpaulihé siá. Gin-ahâ siá ni Utod Balî.
—Mahapunan kitá sa pag-abót didto!— siling niya.
Si Julí nagsunod nga maluspad, nga ang iya mga matá natulok sa ubos, nga walâ magpangahás sa pagtungkaaw. Nagbatyag siá nga ang tanan nagtulok sa iya kag ginhagyòán siá sang ila mga tudlò. Isá ka ngalan nga mangil-ad ang suminggit sa iya palamatin-an, apang ginpabungolbungolan niya kag nagpadayon sang iya paglakát. Apang, sang makità niya ang kombento, dumulog siá kag nagsugod sa pagpalangurog.
—Balik kitá sa baryo, balik kitá! —pakitluoy niya nga hinawiran niya ang iya kaupod.
Inuyatan siá ni Utod Bali sa butkon kag binutong sia sing diutay. ginpalugpayán siá kag ginsugiran sang mga libro sang
3 Ang pila ka pagtapok sa pagkamatuod ginhimo sa amó nga paagi: ginpilit nila ang tawo sa paghimo sang isá ka kalig-unán diin siá nagapahayag nga maluyag siá isaylo sa ibán nga pulo, kag sa sini nga paagi, bilang inopisyal, mabanabo nga ang tinapok indi gid man kay tinapok, kundi sa iya kaugalingon nga kabubut-on luyag niya ang magsaylo sing puloy-an.
