Apang sang ila pagsampot sa ganhaan sa kombento ukón baláy sang parokya, si Julí nangusóg sa pagpangindi sa pagsakà kag nanghawid sa padir.
—Indi, indi!— pakitluoy niya nga punô sing kahadlok. —O, indi, indì; maluoy ka sa akon!
— Apang kabuang...
May kalulô nga inahâ siá ni Utod Bali; si Julí nangindi, maluspì, nga ang iya mga dagway indi na magkalaamo. Ang iya panulok nagsugid nga nakità niya sa iya atubangan ang kamatayon.
— Hanti mabalik kitá kon indi ka maluyag! —hambal sang ulihe sang nadulàan paglaum nga maayo nga babae, nga walâ magpati nga may maskin anó nga tutuo nga katalagman. Si P. Camorra, wala'y sapayán sang tanan niya nga kabantugan, indì magpangahás sa iya atubangan.
—Ipadalá sa ila sa talapukan ang kailó nga si Basilio, ipaluthang sa ila sa dalan sa balibad nga maluyag magpalagyo! —sugpon niya,— ugaling kon patay na siá maabót ang mga paghinulsol. Sa akon, walâ akó sing nautang sa iya nga maskin anó nga kabalaslan. Nahanungód sa akon walâ sia sing ihambal.
Isa yadto ka katapusan nga tublok. Sa atubangan sini nga pamasulbasol, nga may kaakig, may pamakhùon, katulad sang isá nga magahikog, kinipot ni Juli ang iya mga matá agúd indi niya makità ang kaidadalman nga iya pagahulogan kag namat-od nga sumulód sa kombento. Isá ka panghayhay nga daw hagrak kumawas sa iya mga bibíg. Sinunód siá ni Utod Balî nga nagtudlò sa iya kon anó ang iya himùon...
Sang pagkagab-i ginhinambalhambal sa mahinay nga tingog kag sa labing tagù ang nagkalainlain nga mga butang nga nagkahanabò sang amó nga hapon.
Isá ka pamatan-on nga babáe nakalumpat sa bintanà sang kombento nga nagtupâ sa mga bató kag napatáy. Sang amó man nga panahon, isá ka babác gumwâ sa ganhàan kag nagdalagan sa mga dalan nga nagsinggit kag nagsiyagit subong sang
