This page has been proofread.
342
isá ka buang. Ang mahinalungon nga mga kasiling walâ magpangahas sa pagsambit sang ila mga ngalan kag madamò nga ilóy ang nagkusî sa ila mga anák nga babáe sa ila pagmitlang sang mga tinagâ nga makabutáng sa ila sa malain. Sang ulihe, apang sang dugay na gid, sang magsirúm, isá ka tigulang nga lalaki nag-abót gikan sa baryo kag nanawag sa ganhaan sang kombento, nga natakpan kag nabantayan sang mga sakristan. Ang tigulang namulpog sang iya mga inumol, pinukol ang iya ulo, nagsagad singgit nga laós, indì mahangpan katulad sang isá ka apâ, tubtob nga pinahalín siá nga ginhanot kag gintikwang. Hanti kumadto siá sa balay sang gobernadorsilyo, apang ginsingganán siá nga ang gobernadorsilyo walâ didto, nga didto sa kombento; nagkadto siá sa Hukóm sang Paghidait, apang ang Hukóm sang Paghidait walâ man didto, gintawag sa kombento; nagkadto siá sa tenyente mayor, walâ man, didto sa kombento; pumadayon siá sa kwartel, ang tenyente sang Gwardya Sibil didto sa kombento... Hanti ang tigulang bumalik sa iya baryo nga humibî subong sang batà nga diutay; ang iya mga nguyngoy nabatián sang tunga'ng gab-i; ang mga tawo nagkagát sang ila mga bibig, ang mga babae nagtakóp sang ila mga kamót, kag ang mga idû nagsululód sa ila mga baláy, nga tinalawan, nga ginbahág nila ang ila mga ikog!
— A, Dios ko, Dios ko! —silíng sang isá ka imol nga babae, nga nagniwang sa lakás nga pagpuasa. —Sa atubangan mo walâ sing manggaranon, walâ sing imol, walâ sing maputî, walâ sing maitóm, ... hatagan mo kamí sing hustisya!
—Huo, —sabát sa iya sang iya bana, —lamang nga inâ nga Dios indì isá ka patupatò, isá ka lag-it! Silá ang nahauná nga walâ pagpati sa iya!
Sang ikawaló ang taknà sa gab-i, ginsugid nga kapin sa pitó ka prayle, nga naghalalín sa mga banwa nga kaingod, nagtilipon sa kombento nga naghiwat sing isá ka sinapol. Sang masunod nga adlaw, si Lolo Selo nadulà sa baryo nga walâ na magbalik nga nagdalá sang iya sibát sa pangayám.
