- L'Espagne et sa vertu,
- l'Espagne et sa grandeur,
- Tout s'en va! ...
- (VICTOR HUGO)
ANG MGA PAMANTALAAN sa Manila nagpalalabí sa pagbantalà sang sinulát nahanungód sa isá ka binantog nga pagpatay nga nahanabò sa Europa, sa mga pagdayaw kag paghasûhasò sa nagkalainlain nga mga mangwawali sang ulosiudad,1 sa tagsa ka ginsugid nga kadalag-an sang operetang' pransesa, nga halos silá nakahalad sing isá ka artikulo sa mga pagpangatí nga ginhimò sa mga puód sang isá ka gubán sang mga tulisán nga ginpangulohan sang isá ka mabangis nga tagpangulo nga gintawág kay Matáng-uwák. Lamang kon ang atihón isá ka kombento ukón isá ka katsilà, nga mabantalà ang malawig nga mga artikulo nga hatagan nila sing hinitad nga mga pang-id-id kag pangayùon ang paggahúm sang militar sa duóg, pagtatap sa gilayon kbp. kbp. Amó man nga walâ silá magsapák sang nahanabò sa banwa sang Tianì, bisán na lamang isá ka batîbati ukón kunókuno. Sa mga sulosugilanon sang mga tawo may ginhutikhotik, apang tanán tuman ka gumón, indì pat-od, halusón naghiliangot nga walâ mahibal-i bisán na lamang ang ngalan sang napatay, kag yadto'ng mga nagpakità sing labí nga pagtalupangod, nalipát man gilayón. nga nagtuo nga ang hitabû nahusay na sa panimaláy ukón mga himatâ nga nahalitan. Ang nasayran lamang sing pat-od nga si P. Camorra dapat magbiyà sa iya banwa kag magsaylo sa isá man ka banwa ukón magpuyô man anay sa kombento sa Manila.
1 Ulosiudad — Ang kapital nga siudad sang isa ka pungsod.
