Ang paghilabót sang mataas nga alagad apin kay Basilio, sa baylo nga maghatag kaayuhan sa iya, nakapalain pa gani. Nag-agi ang panahon nga ang alagád kag ang I. T. naghugtanay, naglainay sing buót, nga gindugangan sang mga pagsinabtanay. Ang I. T. nagyuhóm nga may kakibáng kag nagsabát:
— Gali? Labi pa gani nga may katarungan nga magpadayon siá nga bilanggò: isá pa ka tuig sa ka tuig sa pagtuón, sa baylo nga halitan siá, magahatag sa iya sing kaayuhan, sa iya kag sa tanán nga sa ulihe mahulog sa iya mga kamót. Sa madamò nga paghanas indi malain ang isá ka manogbulong. Katarungan pa gid nga magpabilin siá! Kag sa ulihe masilíng ang mga maluyag magpanibag-o nga mabinatukon nga kami wala pagtatap sang pungsod! — sugpon sang I. T. nga nagkadlaw nga may yagutâ.
Ang mataas nga alagad nakahangóp sang iya sayóp kag binatyag niya sa tagipusuon ang nahanabò kay Basilio.
— Apang inâ nga pamatan-on sa akon larang amó ang labí nga walâ sing salâ sa tanán. — sabát niya nga may diutay nga katahap.
— Inagawan nila siá sing mga tulon-an, sabát sang tiglikúm.
— Huo, mga sinulatán nahanungód sa Pagpamulóng kag mga tinangkas nga sinulát sang mga tagá-península... nga wala pa gani mautopi ang mga pamihák... kag anó ang buót silingón sinâ? Labot pa, inâ nga pamatan-on walâ gid makabuylog sa sinalusalo sa pansiterya, bisán nakahilabót sa anó nga butáng... Sa nasilíng ko na, siá ang labí nga walâ sing salâ...
— Maayo sang maayo! — nabungát sing malipayon sang I. T. — Sa sinâ nga paagi ang silot labí pa gid nga maayo kag sulundon kay magapabatyag sing labi nga kahadlok! Sa pag-gahúm maghimò sing amó inâ, ginùo ko; sa makadamò dapat ihalad ang kaayuhan sang isá sa kaayuhan sang madamò. Apang, labí pa ang ginahimò ko: sa kaayuhan sang isá ginakuhà ko ang kaayuhan sang tanán; ginalwás ko ang sadsaran
