Naghimulat sa pagpugóng sa iya kaugalingon ang mataas nga alagad. kag walâ siá magsapák sang mga palahidlahid, buót siá magdangóp sa ibán nga kalalangan.
— Apang ikaw Taslangdon walâ mahadlok... sang salabton?
— Anó ang mahadlukán ko? — bungkag sang Heneral nga may kataká. Walâ akó sing kahigayunan sa paggamit sang mga gahúm sa akon kaugalingon? Indi ako makahimò sang akon luyag sa pagpaayo sang pagdumala sini nga kapulòán? Ano ang hadlukan ko? Makasumbong ayhan ang isá ka sulogùón sa akon sa atubangan sang mga hukmanan kag hatagan akó sing salabton? Indì gid! Kag maskin pa siá may mga kalalangan, maagi gid anay sa Talatapán sang Ministro, kag ang Ministro...
Naghagyò siá sang iya kamót kag kumadlaw.
—Ang Ministro nga nagbutáng sa akon sa palangakoan, nakahibaló ang yawà kon diín, kag magabatyag siá sing dungóg sa pagbaton sa akon kon makabalik akó! Ang yarà karón sa palangakoan, inâ sa akon mag-agi... kag inâ walâ man sing mahimò... Ang mabulós sa iya magasakò sa iya bag-o nga hilikutón kag indi makatatap sang mga pitsipitsi. Akó, ginuo ko, walâ akó lwás sa akon ipalatugsiling, nagahimò akó suno sa akon ipalatugsiling, ang akon ipalatugsiling may kalinóng, kag walâ akó pagsapák sang mga kaisipán ni pulano kag ni sutano. Ang akon ipalatugsiling, ginùo ko, ang akon ipalatugsiling!
— Huo, Heneral ko, apang ang pungsod. . .
— Ikaw, ikaw, ikáw, ikáw! Ang pungsod, anó ang labot ko sang pungsod? Nakakità balá akó sing mga kabilinggan tungód sa iya? Nautang ko sa iya ang akon palangakoan? Siá balá ang nagpili sa akon?
Nag-agi ang isá ka tión sang kalinóng. Ang mataas nga alagad nagdukô. Sang ulihe, subong sang pumat-od siá sing isip, binatak niya ang iya ulo, tinulok sing tumod ang Heneral kag, nagpalangluspad kag daw nagpalangurog, nagsilíng siá nga pinunggan niya ang kabaskog:
