mga pilipinhon kag mamangkot kitá kon anó ang himùon naton tungod sa ila. Ay! Sa imo paghipos gintan-aw nakon ang kinamatarong sa pagribók, kag kon ang mga kahimtangan indi mag-ayo, maabot ang adlaw nga maribók silá kag sa pagsalig nga ang hustisya maluntad sa bahin nila kag sa sinâ mabuyok nila ang mga kaluoy sang tanan nga katawohan nga dungganon, sang tanan nga nagahigugma sang ila mga pungsod sa kalibutan. Kon sa isá ka banwa ginadumilì ang kasanag, ang puloy-an, ang kaluwasan, ang hustisya, mga butáng nga kon walâ iní indì mahimò ang kabuhi kag amó tanán ang pagkabutáng sang tawo, inâ nga banwa may kinamatarong sa pagbilang sa nagahimò sing subong sa iya katulad sa isá ka buyóng nga nagalambat sa aton sa alagyan: walâ sing pinilian, walâ sing pinasahi, walâ sing liwan kundi isá lamang ka buhat, isá ka pagkabutáng, isá ka kalakasán, kag ang tanan nga tawo nga dungganon nga indi magkadto sa bahin sang nahalitan mahimò nga kabuylog sang kasumpong kag magamusing sang iya ipalatugsiling. Huo, indi akó soldado, kag ang mga tinuig nagapalong sang diutay nga kalayo sa akon dugô; apang amó man gihapon nga mapahatúkhatók akó sa pag-apin sang kadungganan sang España batok sa isa ka sumalakay nga dumoluong ukón batok sa indi matarong nga pagpakalain sang iya mga puód, subong man nga ginapasalig ko ikaw nga makadto ako sa luyó sang mga pilipinhon nga ginalupig, kay pasulabihon ko ang mapatay sa pag-apin sang mga kinamatarong sang katawohan nga ginalapak, sangsa magdaóg sa kaayuban sang mga hakugán sang isá ka pungsod, bisán pa nga iní nga pungsod ginahingalanan subong sang paghingalan nga España!...
— Nahibal-an nimo kon san-o malakát sang koreyo? — mabugnaw nga pamangkot sang I. T. sang makatapos hambal ang mataas nga alagad.
Tinulok siá sing tumod sang mataas nga alagád, sang ulihe dumukô kag sa hipos nanaog sa palasyo. iya.
Sa pamulakan nakità niya ang iya kotse nga naghulát sa
— Sa adlaw nga malawag kamó nga hilway, hambal niya sa sulugùón nga indyo nga nagbukás sa iya sang ganhaan sang
