indi maluyag magkadto didto sa ibabaw nga kubyerta, kay
nahadlok siá nga pamangkutón ni Donya Victorina nahanungód
kay don Tiburcio. Dumdumón mo! Sang makità akó ni Da.
Victorina nga isá ka sumalakay didto sa pruwa, tinulok niya
akó nga may pagyubit..
Sa amó nga tión nanaog si Simoun, kag sang makita niya ang duhá ka pamatan-on,
—Paalam, Dn. Basilio, —silíng niya nga nagyaób sa tingog sang nagapangapin, —mabakasyon ka? Ang tawo kasimanwa mo?
Pumakilala si Basilio kay Isagani kag nagsilíng nga indi silá magkasimanwa, apang nga ang ila mga banwa walâ nagahilayòáy sing daků. Si Isagani nagpuyo sa baybay sang dagat sa pihák.
Tinulok ni Simoun si Isagani sing tuman kasusi nga iní bumatyag sing kataká binalusan niya kag tinulok sing tampad nga daw may panghangkat.
—Kag paano man ang puód? — pamangkot ni Simoun nga tumalikod kay Basilio.
—Ngàa, walâ nimo mahibal-i?
— Ngàa nga yawà nga mahibal-an ko sing walâ pa gani akó makatapak didto? Sugid nila sa akon imol gid kaayo kag walâ pagbakál sing mga alahas...
— Walâ kami pagbakál sing mga alahas kay indi namon inâ kinahanglan, —sabát ni Isagani sing mabugnaw, nga nasakit ang iya bugál sa pagka-taga-puód.
Isá ka yuhóm ang nabanhay sa maluspi nga mga bibig ni Simoun.
—Indi ka maakig, pamatan-on,— sabát niya,— walâ gid akó sing maskin anó nga malain nga tuyò, apang sanglit ginpasalig nila akó nga halos ang tanan nga parokya yarà sa kamót sang mga klérigo5 nga indyo, nagsilíng ako sa akon kaugalingon: ang mga prayle nagakalamatay sa isá ka parokya kag ang mga pransiskano nagabalatyag nga tuman na ang mga labing' kubós, gani nga kon ang isá kag isá mahatag sa mga klérigo, tungod kay didto walâ na makilala ang dagway sang hari. Apang pabay-an naton inâ, mga ginùo, karí kamó
__________________
5 Clérigo - Isá ka pari nga pilipinhon sa simbahan nga Katoliko.
