paglakát sang tanan nga indi anay makapamatuod nga makahinguyang kag makapuyô sing matawhay sa tungâ sang mga siudad sa Europa. Sa mga kilala naton yadto'ng mga nakahalín nga nahilway sing maayo amó sanday Isagani kag Sandoval: ang nahauná nakatapos sang pagtulon-an nga iya gintun-an sa idalum sang pagtudlò ni P. Fernandez kag pinauntat siá sa pagtùón sang ibán, kag ang ikaduhá nakapalingin sang mga ulo sang mga hukóm sa tribunal sa kusóg sang mga pamulong-pulong. Si Basilio amó lamang ang walâ makatapos sang mga pagtulon-an, walâ man mapauntat, bisán makalakát sa Europa: dalayon nga ginbilanggò siá sa Bilibid, nga gin-usisà siá tagsa sa tatlo ka adlaw, sa amó man gihapon nga mga butáng, nga walâ sing ibán nga bag-o lwás sang pag-inilis-ilis sang mga hukóm nga mangungosisà kay sa atubangan sang madamò nga
kasal-anan ang tanán daw mahulog ukón malagyo sa kakugmat.Kag samtang nga nagtulog silá kag ginpaigod ang mga papeles sa asunto, samtang ang mga papeles nga gin-alakrihán ginsulitsolit katulad sang mga hampol sang manogbulong nga pakok sa lawas sang isá ka nagabalatián sa kamingaw, si Basilio nakasayod sang tanán nga butáng nga nahanabò sa Tianì, sa kamatayon ni Juli kag sa pagkadulà ni Lolo Selo. Si Sinong. ang hinanot nga kotsero nga nagdul-ong sa iya sa San Diego, nakità sadto sa Manila, dinuaw siá kag nagsugid sa iya sang tanán.
Sa karón si Simoun nag-ayo na, nga amó iní ang ginpanugid sang mga pamantalaan. Si Ben Zayb nagpasalamat sa "Makaakò nga nagbantay sa amó ka malahalon nga kabuhi," kag nagpahayag sang paglaum nga ang Taslangdon mahimulat nga maabót ang adlaw nga matukibán ang kriminal. nga sa iya salâ walâ pa masiloti salamat sa kaluoy sang nahalitan, nga nagsunod sing tuman sa mga tinagâ sang Daku nga Tigbatás: Amáy ko, patawara sila kay wala silá makasayod sang ila ginahimò!" Iní kag ibán pa nga mga butang ang ginhambal ni Ben Zayb sa pamantalaan, samtang nga sa bàbà namangkot siá kon balá matuod ang huringhoring nga ang
