niya masayri, apang may katul-id: ang babáe makadto sa lalaki nga labing makasaráng, sa isá nga makahibaló makigbagay sa mga kahimtangan sa tungâ sang iya ginapuy-an, kag sa pagpuyo sa Manila walâ sing maayo lwás kay Pelaez, nga kutob sang diutay pa nakahibaló na sa utbong sang iya mga tudlò
sang hambal nga kinamatís.Ang kwaresma lumigad upód ang iya Semana Santa, ang iya pasundayag sang mga katay kag mga palatuntonan, nga walâ sing liwan nga butang nga bag-o kundi ang makatilingala nga kinagubot sang mga artilyero, nga ang kabangdanan walâ man mahayagí. Pinagubâ ang mga baláy nga pinatindog sa mamag-an nga mga idadapát, sa nagtilipon nga gubán sang kabalyeriya nga maluthang sa mga tag-iya kon silá magpakigsumpong; madamò ang hinibì kag mga panaghoy, apang ang hitabu walâ magkapín dirâ. Ang mga maluyag maghisayod, nga sa ila nalakíp si Simoun, nagkaladto sa pagtan-aw sang nagkalabilín nga walâ sing mga puloy-an, nga nagdayandayan nga nagpakità nga daw walâ lang sa ila bungog kag naghalambal nga sa ulihe saráng silá makatulog sing malinóng.
Sa talispusposán sang Abril, nalimtan na ang tanan nga kahadlok, ang Manila nanumdom sang isá lamang ka hitabû. Isá yadto ka pandot nga idulot ni don Timoteo Pelaez sa kasál sang iya anák nga sa iya ang Heneral, mahamuot kag mapainubuson, nagtanyag nga mangin-paninoy. Ginsugid nga si Simoun amó ang naghusay sang tanán. Ang kasál hiwaton. duhá ka adlaw sa wala pa makataliwan ang Iya Taslangdon; iní magapadungóg sa kasal kag mahatag sing dulot sa nobyo. Ginhuringhoring nga ang manog-alahás maulà sing busáy sang mga brilyante, manabwag sing mga hakóp sang mga mutya, bilang halad sa anák sang iya kakumboya kag sanglit, indì siá makahatag sing bisán anó nga pandot sa iya balay kay walâ siá sing isá nga iya kaugalingon kag sanglit ulitawo siá, himuslan niya ang hitabû sa pagpakibót sa banwang' pilipinhon sang isá ka pagabatyagón nga pagpaalam. Ang bug-os nga Manila naghulát nga pagaagdahón: wala pa mahanabò nga ang kaaliwasá naggahúm sing labí kabaskog sa mga panumdoman,
